Niyanig ng 6. 9 magnitude na lindol ang Chile.
Ayon sa US Geological Survey, natukoy ang sentro ng lindol sa layong 93 kilometro hilagang kanluran ng Coquimbo at may lalim na 10 kilometro.
Sa kabila nito, wala namang napaulat na pinsala at wala ring naidulot na tsunami ang naturang paglindol.
Ang Chile ay malimit na makaranas ng lindol kung saan pinakamalakas ay naitala noong 1960 na nasa magnitude 9.5 at 2010 na nasa magnitude 8.8.
By Ralph Obina
Muling nagsagawa ng ‘Oplan Galugad’ ang Bureau of Corrections (BUCOR) sa maximum security compound ng New Bilibid Prisons (NBP).
Nasabat sa balwarte ng Batang City Jail Gang ang mga male sex enhancing drugs, mamahaling mga alak, TV, refrigerator, cellphone, signal booster at iba pa.
Ipinag-utos ni BUCOR Director Rainier Cruz na imbestigahan ang may 20 preso na nahulihan ng mga bawal na kagamitan sa loob ng kanilang selda.
Hindi nakaligtas sa ‘Oplan Galugad’ ang mga simbahan at religious temple sa loob ng maximum security compound.
Nakuha sa loob ng catholic chapel ang TV, refrigerator at mga computer samantalang wala namang nakuhang bawal na gamit sa Buddhist temple na nasa carcel West ng maximum security compound.
Tiniyak ng BUCOR na magtutuloy-tuloy ang gagawin nilang ‘Oplan Galugad’ sa loob ng New Bilibid Prison upang tiyaking wala nang matitirang kontrabando sa piitan.
By Len Aguirre | Jopel Pelenio (Patrol 17)
Mawawalan ng 5 oras na suplay ng tubig ang ilang bahagi ng Metro Manila mamayang gabi.
Batay sa abiso ng Manila Water Corporation, magsisimula ang water interruption mamayang alas-10:00 ng gabi kung saan ang mga maaapektuhan ay ang ilang lugar mula sa Quezon City, Taguig at Mandaluyong.
Ipinabatid pa ng Manila Water na posibleng maranasan ang water interruption hanggang ng Nobyembre 12.
By Ralph Obina
Siyam (9) ang pinangangambahang patay sa pagsalpok ng isang private jet sa isang apartment building sa siyudad ng Akron sa Estados Unidos.
Ayon sa ulat, ang twin engine business jet ay patungo sana sa paliparan ng Ohio nang mag-crash ito sa naturang gusali.
Sakay ng naturang eroplano ang 7 pasahero at 2 piloto.
Patuloy namang iniimbestigahan ng mga otoridad ang nangyaring aksidente.
By Ralph Obina
Photo: Screengrab from NBC.news
Tiniyak ng Department of Foreign Affairs (DFA) na ibabalik nila ang mainit at magandang pagtrato na ibinigay ng China sa Pangulong Benigno Aquino III nang dumalo ito sa APEC Summit sa China noong nakaraang taon.
Ayon kay Assistant Secretary Charles Jose, Spokesman ng Department of Foreign Affairs (DFA), isa sa mga pangunahing dahilan ng pagbisita sa bansa ni Chinese Foreign Minister Wang Yi ay upang tiyaking magiging ligtas at matagumpay ang pagdalo ni Chinese President Xi Jinping sa APEC Summit.
“Ang main concern po nila ay sana ang pagpunta po dito ni Chinese President Xi Jinping ay maging safe, maging successful ang kanyang pagpunta dito, at ang pangalawang topic po ay ang ating bilateral relations sa pagitan ng Pilipinas at China at nagkasundo po ang parehong panig na i-resume po ang foreign ministry consultations.” Ani Jose.
Kinumpirma ni Jose na napagkasunduan ni Wang at Foreign Affairs Secretary Albert del Rosario na huwag isulong sa APEC Summit ang hindi pagkakaunawaan ng dalawang bansa sa isyu ng West Philippine Sea.
Maging sa bilateral talks aniya nina Del Rosario at Wang ay hindi pag-uusapan ang isyu ng West Philippine Sea dahil may nakahain nang kaso hinggil dito sa Arbitral Tribunal ng UNCLOS.
“Sabi lang nila sana ay walang ire-raise na contentious issues sa APEC, sa panig naman po natin alam po natin na hindi proper venue ang APEC para pag-usapan ang mga political security issues, hindi naman po natin ire-raise itong South China Sea at sa bilateral level hindi din po natin pag-uusapan kasi meron tayong naka-pending na case.” Pahayag ni Jose.
By Len Aguirre | Ratsada Balita
Sinungaling ka!!! ang magiging tema ng paggunita sa ika-anim na anibersaryo ng Maguindanao massacre sa Nobyembre 23.
Ayon kay Joel Egco, Pangulo ng NPC o National Press Club, sisingilin na nila ang Pangulong Benigno Aquino III sa pangako nitong reresolbahin ang kaso ng pagpatay sa 58 katao na kinabibilangan ng 32 mamamahayag noong November 2009.
Sinabi ni Egco na wala ring nagawa ang Pangulo sa patuloy na pagpatay sa mga miyembro ng media.
“Sinungaling ka, yan ang ating tema ngayon, malinaw na pangako na yan ang pagresolba diyan sa Maguindanao massacre at pagputol sa tuluy-tuloy na kaso ng pagpatay ng media, for this year kumbaga sisingilin na natin siya sa mga pangako niya kaya yan an gating tema, sinungaling ka!” Pahayag ni Egco.
Tulad ng dati, babalutin ng telang itim ang tanggapan ng NPC sa anibersaryo ng Maguindanao massacre.
Sa huling pagkakataon sa ilalim ng Aquino administration ay magmamartsa rin ang mga taga-NPC, iba pang miyembro ng media at pamilya ng mga biktima ng Maguindanao massacre mula sa tanggapan ng NPC patungo ng Mendiola.
Gagawa rin ang NPC ng effigy ni Pangulong Aquino na may mahabang ilong na may backhoe sa dulo bilang simbolo ng di umano’y pagsisinungaling nito na aaksyunan ang Maguindanao massacre at media killings.
Batay sa datos, nasa mahigit 30 na ang napatay na mamamahayag sa ilalim ng Aquino administration.
By Len Aguirre | Balitang Todong Lakas
Posibleng ungkatin pa rin ng Estados Unidos ang isyu ng agawan ng teritoryo sa West Philippine Sea o South China Sea sa APEC o Asia Pacific Economic Cooperation Summit.
Ayon kay Mark Toner, Spokesman ng US State Department kung wala man ito sa formal agenda ng APEC Summit, maaari itong maungkat sa sidelines o sa labas ng pormal na pulong.
Una nang nagkasundo ang Pilipinas at ang China na huwag nang isulong na mapag-usapan sa APEC Summit ang isyu ng agawan ng teritoryo sa West Philippine Sea.
By Len Aguirre
Timbog sa buy bust operation ang isang opisyal ng barangay sa Zamboanga City.
Kinilala ang suspek na si Jonash Jubaira, 35-anyos, treasurer ng barangay Tugbungan sa lungsod ng Zamboanga.
Narekober sa suspek ang 7 sachet ng hinihinalang shabu at kalibre 38 baril na may kasamang apat na bala.
Dahil dito, nakakulong ngayon sa Tutuan Police Station si Jubaira at kinasuhan ng paglabag sa Comprehensive Dangerous Drugs Act.
By Ralph Obina
Asahan na ang matinding trapik sa EDSA simula sa susunod na linggo kasabay ng pagdating ng mga delegado ng APEC Summit.
Ayon kay PNP Highway Patrol Group Director Chief Superintendent Arnold Gunnacao, ito ay dahil sa outermost lanes lamang ng EDSA ang maaaring daanan ng mga motorista.
Paliwanag ni Gunnacao, ito ay dahil sa ang innermost lanes sa north at southbound lane ng EDSA Shaw hanggang Roxas Boulevard ay itinalaga bilang APEC lanes.
Tanging ang may mga plaka at sticker lamang ng APEC ang maaaring makadaan sa naturang linya.
Samantala, bilang bahagi din seguridad na ipatutupad ng HPG, kanilang pahihintuin ang mga motorista sa EDSA, 30 minuto bago dumaan ang convoy ng mga delegado ng APEC Summit.
By Ralph Obina
Bukod sa pagpupulong ng 21 lider ng mga bansang kasapi ng APEC hinggil sa ekonomiya ng rehiyon, sasamantalahin din ng Pilipinas ang pagkakataon upang makipag-usap sa iba pang bansa kaugnay ng ilang importanteng bagay.
Kabilang dito ang paglagda sa kasunduan ng strategic partnership sa pagitan ng bansa at ng Vietnam na kapwa pangungunahan nina Pangulong Benigno Aquino III at ni President Truong Tan Sang.
Ayon kay Department of Foreign Affairs o DFA Asst. Sec. Charles Jose layon ng naturang strategic partnership na iangat pa ang relasyon ng dalawang bansa, partikular sa usapin ng seguridad sa pamamagitan ng pagpapaigting ng kanilang mga militar, pagbisita sa mga daungan at mga information sharing at joint activities.
Bukod dito, layunin din aniya nito na suportahan ang pagtutulungan ng mga bansa sa Asya sa usapin ng depensa at maritime security.
Ang nasabing strategic partnership ay magaganap sa sidelines ng APEC Summit sa susunod na linggo.
By Allan Francisco
