Isinisi sa mga traders ng Samahang Industriya ng Agrikultura (SINAG) ang biglaang pagtaas ng presyo ng sibuyas.
Ayon sa grupong SINAG, hindi dapat ang mga magsasaka ang sisihin sa naturang problema kundi ang mga onion traders na nais i-monopolya ang bentahan ng sibuyas.
Naniniwala din ang SINAG na artipisyal lamang ang pagtaas ng presyo ng sibuyas.
Matatandaang mula sa dating P80 kada kilo na presyo ng sibuyas ay pumalo na ito ngayon sa P110 kada kilo.
By Ralph Obina
Daan-daang mga tauhan ng PNP Highway Patrol Group ang ipakakalat sa susunod na linggo.
Ayon kay HPG Spokesman Supt. Grace Tamayo, kabuuang 842 tauhan ang kanilang ide-deploy para sa seguridad ng convoy ng mga delegado sa APEC Summit.
Sa naturang bilang, 300 aniya rito ang naka-augment sa PSG o Presidential Security Group na siyang magbibigay seguridad sa mga head of states, 282 ang ibinigay nila sa police security protection group para naman sa seguridad ng mga minister.
Habang ang 227 HPG personnel ay nakatalaga sa EDSA partikular sa tinatawag na APEC lane.
Tiniyak ni Tamayo na nakahanda na ang mga sasakyan na gagamitin ng kanilang mga tauhan tulad ng motor at mobile patrol na may mga sticker na rin ng APEC.
Sasampahan ng kasong administratibo at kriminal ng National Press Club (NPC) si SPO1 Manuel Layson, ang pulis Marikina na umano’y nang harass at nanakit sa DZRH reporter na si Edmar Estabillo.
Sinabi ni National Press Club President Joel Egco na maliwanag na pag-abuso sa kapangyarihan, pagiging arogante at kayabangan ang ipinakita ni Layson kay Estabillo.
“Administratibo at criminal charges ang isasampa natin sa doon pulis na nabalita at sa iba pa niyang kasama na nandoon lang din, nanonood lang, nakangiti pa yung isa, i-identify din natin yung isang tatawa-tawa pa.” Ani Egco.
Samanatala ipinag-utos na ni Eastern Police District (EPD) Director Elmer Jamias ang pagsibak sa pwesto kay SPO2 Manuel Layson.
Ayon kay Jamias, didis-armahan muna si Layson at ipatatawag sa EPD Headquarters habang iniimbestigahan ang insidente.
By Mariboy Ysibido | Balitang Todong Lakas
Matatanggap na ng mga empleyado ng gobyerno ang kanilang bonus simula sa kalagitnaan ng Nobyembre, ayon sa Department of Budget and Management (DBM).
Ayon kay Budget Secretary Florencio Abad, simula November 15, irerelease na ang second half ng year-end bonus ng mga government employees.
Katumbas ito ng isang buwang sweldo ng manggagawa at ang P5,000 cash gift na unang ipinangako ng pamahalaan.
Sa ilalim ng 2015 budget, may nakalaang P20.95 bilyong pisong pondo ang gobyerno para sa year-end bonus ng mga manggagawa sa pampublikong sektor.
Ito’y bukod pa sa P4.69 bilyong pisong inilaan bilang cash gift.
Kasama sa makakatanggap ng bonus ang lahat ng mga national government officials at employees na regular, temporary, casual o contractual, part-time o full time, na nakapagtrabaho ng hindi bababa sa apat na buwan sa pagitan ng January hanggang October 31.
Noong May, tinanggap ng mga government workers ang unang bahagi ng kanilang bonus.
By Mariboy Ysibido
Inilabas na ng Philippine Postal Office o Philpost ang espesyal na disenyo ng mga commemorative stamps para sa Asia Pacific Economic Summit.
100,000 kopya ng APEC commemorative stamps ang inimprenta ng Philpost.
Nagkakahalaga ito ng 30 bawat isa at magiging available sa mga post office hanggang sa 2016.
By: Meann Tanbio
Inihayag ng Department of Agriculture (DA) na mag-aangkat ng sibuyas na pula ang bansa bago matapos ang 2015.
Ayon kay Agriculture Assistant Secretary for Planning and Project Development Atty. Paz Benavidez II, naapektuhan ng husto ang produksyon ng sibuyas dahil sa bagyong Lando at epekto na rin ng El Niño phenomenon.
Ipinabatid ni Benavidez na umaabot sa 121 import permit ang kanilang na-issue sa 19 na importer ng sibuyas.
Sa 121 naisyung import permit, ito ay may katumbas na 6,050 metriko tonelada pa lamang.
Naniniwala ang DA na inaasahang bababa na ang presyo ng sibuyas na pula sa sandaling dumating na sa bansa ang mga inangkat na sibuyas mula sa China at India na kapwa pumasa sa pest risk analysis ng Pilipinas.
Sa sibuyas na dilaw naman, kabuuang 9,617.45 metriko tonelada na ang naangkat ng pribadong sector para sa may 229 import permit na naisyu ng Bureau of Plant and Industry o BPI.
By Meann Tanbio | Monchet Laranio
Tiniyak ng pamunuan ng Light Rail Transit Authority na tuloy ang operasyon ng kanilang mga tren sa panahon ng Asia Pacific Economic summit.
Ang pahayag ay ginawa ni LRTA Spokesman Atty. Hernando Cabrera, sa harap na rin ng mga katanungan patungkol sa kanilang mga byahe dahil ilang lansangan ang isasara dahil sa summit.
Siniguro ni Cabrera na normal ang operasyon ng LRT lines 1 at 2 upang mapagsilbihan ang mga pasaherong may pasok pa rin sa kani-kanilang tanggapan kahit holiday.
Ang LRT ang mass transport na dadaan sa mga lugar na malapit sa pagdarausan ng APEC.
By: Meann Tanbio
Nagkaroon na ng sariling bahay ang ilan sa mga pamilyang umano’y itinago noon ng gobyerno nang bumisita si Pope Francis sa Pilipinas noong nakaraang Enero.
Ayon kay Department of Social Welfare and Development (DSWD) Secretary Dinky Soliman, 75 sa mga pamilyang dinala noong Enero sa Batangas ang may sarili nang tahanan at nahanapan aniya ng tirahan ang mga ito sa unang quarter pa lamang ng taong ito.
Ipinabatid ni Soliman na mahigit 4,000 pamilya na ang rehistrado sa Modified CCT o Conditional Cash Transfer na sinimulan nila noon pang 2013.
Bukod dito, tinanggi rin ni Soliman ang kumakalat na balitang binibigyan ng P4,000 ang bawat pamilya dahil pambayad umano ito sa upa sa kanilang tinitirhan.
Nilinaw ni Soliman na hindi nila ibinibigay sa pamilya ang nasabing pera dahil diretsong binabayaran ng DSWD ang upa.
Kasabay nito, muling iginiit ni Soliman na dinala nila sa Batangas ang mga street dweller para maipaliwanag sa kanila ang CCT.
By Judith Larino
Umaabot na sa 1,364 ang kanseladong flights bago at matapos ang Asia Pacific Economic Cooperation summit.
Kabilang sa mga nagkansela ng flights ang Philippine Airlines, Cebu Pacific at CEBGO mula November 15 hanggang 21.
280 domestic at 78 international flights ang kinansela ng PAL; habang ang Cebu Pacific ay 365 domestic at 29 international flights; at ang CEBGO ay nasa 29 na domestic flights.
Nakatakdang isagawa ang APEC meetings mula november 16 hanggang 20.
By: Meann Tanbio
Nakakuha ng suporta ang hirit ni Senate Minority Leader Juan Ponce Enrile na buksang muli ang imbestigasyon sa madugong Mamasapano massacre.
Kabilang sa mga pabor sa re-investigation sa Mamasapano incident sina Senador Bongbong Marcos, Francis Escudero at Serge Osmeña.
Magugunitang nakakulong si Enrile nang isagawa ang nasabing pagdinig kaya’t nais itong pabuksang muli upang malinawan sa maraming bagay.
9 na buwan makaraan ang masaker, wala pa ring criminal charges na naisasampa sa korte laban sa mga responsable sa pagkamatay sa tinaguriang Special Action Force 44.
By: Meann Tanbio
