June 2026

Nanawagan si Palo Archbishop John Du sa pamahalaan na ilabas na ang mga napaulat na hindi nagastos na pondong nakalaan para sa rehabilitasyon ng mga lugar na sinalanta ng super bagyong Yolanda.

Sinabi ng arzobispo, maituturing na kawalang hustisya ang patuloy na pagkakabalam ng rehabilitation projects para sa pagbangon ng mga sinalanta ng kalamidad.

Binigyang diin pa ng arzobispo na dapat pakatutukan ng mga pulitiko ang paglilingkod sa taumbayan sa halip na sa kani-kanilang partido pulitikal at pansariling interes.

Kasunod nito, nananalangin si Archbishop Du para sa mabilisang pagtatayo ng mga kabahayan para sa mga sinalanta ng bagyo upang maging ganap ang kanilang pagbangon.

By  Jaymark Dagala 

Nakatakdang i-auction ng Bureau of Customs at PCGG ang ilang alahas na narekober mula sa pamilya Marcos na nagkakahalaga ng lima hanggang walong milyong dolyar.

Bumuo na ng Inter-Agency Working Group ang Customs at PCGG para mailatag ang mga detalye ng auction sa mga naturang Marcos jewelry.

Ang lahat nang mapagbebentahan ng mga naturang alahas ay ide-deposito sa national treasury accounts.

By  Judith Larino 

Nagpaliwanag si Department of Foreign Affairs (DFA) Spokesman Assistant Secretary Charles Jose patungkol sa pinag-usapan nina Secretary Albert del Rosario at Chinese Foreign Minister Wang Yi.

Ayon kay Jose, layon ng pagdalaw ni Wang sa DFA ay para sa ginanap na bilateral talks sa pagitan ng dalawang bansa.

At ang pangalawang dahilan aniya ay upang tiyakin lamang ang attendance ng kanilang pangulo para sa APEC.

Sinabi ni Jose na nais ng Chinese Foreign Minister na tiyakin na magiging smooth, ligtas at matagumpay ang pagbisita ng kanilang Pangulo sa bansa at sa APEC.

“Nagkasundo po ang parehong panig na i-resume po ang foreign ministry consultations para mag-explore ng areas or ways para paano mapa-move forward ang ating bilateral relations although meron tayong differences dito sa South China Sea issue.” Ani Jose.

Kasabay nito, nanawagan ang DFA official sa mga magsasagawa ng pagkilos sa pagdating sa bansa ng presidente ng China.

“Hindi po natin mapipigilan ang mga kababayan natin na magsagawa ng ganyang klaseng pagkilos dahil right po nila yun, freedom of expression, so iginagalang po natin yan ang pakiusap lang po natin sana huwag maka-disrupt sa proceedings ng APEC o hindi mag-result in injury, or death or damage to properties.” Pahayag ni Jose.

By   Meann Tanbio | Ratsada Balita  

Papayagan nang makaboto sa 2016 elections ang mga rehistradong botante na may incomplete at corrupted biometrics data.

Ayon kay Commission on Elections (COMELEC) Spokesman James Jimenez, alinsunod ito sa COMELEC Resolution Number 10013 na nagsasabing hindi maaaring i-deactivate ang mga botanteng mayroong incomplete at corrupted biometrics data, sa halip ay payagang makaboto sa halalan sa susunod na taon.

Gayunman, sinabi ni Jimenez na hindi papayagang makaboto ang mga botanteng walang biometrics at tuluyan nang tatanggalin sa voter’s list.

By  Meann Tanbio