June 2026

Tila nagmamakaawang hiniling ni Senador Alan Peter Cayetano kay Davao City Mayor Rodrigo Duterte na tumakbo na sa 2016 presidential elections.

Si Duterte ay kabilang sa mga panauhin ni Cayetano sa pagdiriwang ng kaniyang ika-45 kaarawan sa Taguig City kahapon.

Ipinaabot ni Cayetano kay Duterte ang pagnanais niyang maka-tandem pa rin ang alkalde na matigas naman sa kaniyang paninindigang hindi talaga siya tatakbo.

Una nang nagkita sa Davao City sina Cayetano at Duterte at sinasabing pinag-usapan ng mga ito ang posibleng pagsasanib puwersa sa susunod na eleksyon.

By  Judith Larino  

Halos P50 bilyong piso ang nalulugi sa gobyerno kada taon matapos dayain ng operators ng STL o Small Town Lottery.

Ito ayon sa National Bureau of Investigation (NBI) ay sa pamamagitan nang hindi pagdedeklara ng actual sales ng STL operators taun-taon.

Kinumpirma ni Philippine Charity Sweepstakes Office (PCSO) Chairman Ayong Maliksi ang nasabing findings ng NBI matapos niyang hilingin dito ang pag-imbestiga sa STL operators kaugnay sa report na ginagamit ng ilan sa mga ito ang kanilang lisensya para sa jueteng operations at hindi pag deklara ng aktuwal na kita sa PCSO.

Ayon pa kay Maliksi, pumapalo sa P100 billion pesos kada taon ang inaasahang kita sa lahat ng illegal games kabilang ang illegal declaration mula sa STL base na rin sa gaming product development and marketing sector ng kanilang tanggapan.

By  Judith Larino

Naging matagumpay naman ang isinagawang dry run ng Metropolitan Manila Development Authority o MMDA para sa exclusive lane para sa mga delegado ng APEC Summit sa EDSA.

Ito’y sa kabila ng pagkainis ng maraming motorista dahil nagdulot ito ng masikip na daloy ng trapiko.

Ayon kay Cris Saruca, Traffic Discipline Officer ng MMDA, isa lamang patunay ang ginawang dry run na kayang mapabilis ang biyahe ng mga delegadong gagamit ng nasabing daan.

Tanging si Russian President Vladimir Putin ang manunuluyan sa Shangri-La Plaza Hotel sa Shaw Boulevard, habang karamihan naman ay manunuluyan sa Makati Business District.

Bagama’t walang isinarang kalsada, inilagay naman ng MMDA ang mga plastic barriers na magsasabing iyon ang expess lane para sa APEC delegates.

By Jaymark Dagala  

Sinugod ng hindi bababa sa 30 mga New People’s Army (NPA) ang detachment ng Philippine Coast Guard (PCG) sa Caramoan, Camarines Sur.

Batay sa paunang impormasyong ibinigay ni Camarines Sur Provincial Dir. S/Supt. Walfredo Pornillos, tinangay ng mga armadong rebelde ang isang armalite rifle at radio equipment mula sa barracks ng Coast Guard doon.

Sinabi pa ni Pornillos na hindi na nagawang pumalag pa ng mga tauhan ng Coast Guard na nakaduty sa lugar nang mangyari ang insidente.

Bahagya pang nagkaroon ng tensyon sa pagitan ng mga pulis at rebelde habang papatakas ang mga ito.

By  Jaymark Dagala | Jonathan Andal 

Iginiit ng Philippine National Police (PNP) Highway Patrol Group na hindi ningas kugon ang nasimulan nilang clearing operations sa Mabuhay Lanes sa Metro Manila.

Ayon kay PNP-HPG Dir. C/Supt. Arnold Gunnacao, magtutuluy-tuloy ang kanilang paglilinis sa mga alternate routes para bigyang daan ang mga motoristang nais umiwas sa EDSA.

Permanenteng alternatibong ruta na aniya ang Mabuhay Lanes na maaaring daanan ng mga motorista hindi lamang sa panahon ng Kapaskuhan.

Kaninang umaga, sinugod ng mga tauhan ng PNP-HPG ang mga sasakyang nakabalandra sa mga kalsada sa Maynila kung saan, ilang sasakyan din ang kanilang pinagbabatak.

By Jaymark Dagala | Jonathan Andal

Kinondena ng grupo ng mga mamamahayag ang insidente ng panghaharas ng isang pulis sa isang radio reporter.

Batay sa pahayag ng Justice Reporters Organization o JUROR, malinaw na isang pagsupil sa malayang pamamahayag ang ginawa ng pulis Marikina na si SPO2 Manuel Layson sa DZRH reporter na si Edmar Estabillo.

Sinasabing pinagsusuntok, sinakal at pinosasan ng pulis si Estabillo matapos tingnan ang police blotter sa Marikina City Police bilang bahagi ng paghahanap ng balita.

Nanawagan naman ang grupo sa pamunuan ng PNP na agad aksyunan ang nasabing insidente at papanagutin ang mga pulis sa sangkot sa pananakit.

By Jaymark Dagala | Bert Mozo (Patrol 3)  

Tiniyak ng pamunuan ng Philippine Air Force (PAF) na mahigpit ang kanilang ipatutupad na seguridad sa panahon ng APEC Summit.

Ayon kay Col. Enrico Canayan, tagapagsalita ng Air Force, partikular nilang tututukan ang air transportation gayundin sa security operations.

Handa rin ang kanilang mga air assets sa sandaling kailanganing ilipad ang mga delegado ng APEC.

Bagama’t sinabi ni Cayanan na nakalerto na sila sa mga gagawing operasyon sa susunod na linggo pero tumanggi na itong magdetalye sa kadahilanang pangseguridad.

By Jaymark Dagala | Jonathan Andal