June 2026

Nais ng kampo ni dating Pangulo ngayo’y Pampanga Congresswoman Gloria Macapagal Arroyo na palawigin pa ng hanggang anim na buwan ang status quo ante order ng Korte Suprema.

May kaugnayan ito sa multibilyong pisong anomalya hinggil sa paggamit umano ng intelligence fund ng Philippine Charity Sweepstakes Office o PCSO.

Ayon kay Atty. Lawrence Arroyo, abogado ng mambabatas, ihahain nila ito sa pamamagitan ng isang mosyon sa Korte Suprema.

Magugunitang ipinatigil kamakailan ng High Tribunal ang pagdinig ng Sandiganbayan sa plunder case ni Arroyo na magtatagal ng isang buwan.

By  Jaymark Dagala | Jill Resontoc (Patrol 7)  

Pabor si Senador Koko Pimentel sa hirit ni Senate Minority Leader Juan Ponce Enrile na muling buksan ang imbestigasyon sa madugong Mamasapano massacre.

Sinabi ng senador, makabubuting maipalabas ang buong katotohanan upang hindi na maulit pa ang malagim na sinapit ng tinaguriang SAF 44.

Gayunman, sinabi ni Pimentel na back to square one ang mangyayari sa committee report na ginawa ni Senadora Grace Poe dahil sa ibabalik ito sa komite para sa re-investigation

Magugunitang nakakulong si Enrile nang isagawa ang nasabing pagdinig kaya’t nais itong pabuksang muli upang malinawan sa maraming bagay.

By Jaymark Dagala  

Mailalagay na ang mga bagong escalators sa lahat ng istasyon ng Metro Rail Transit o MRT Line 3 sa susunod na buwan.

Ayon kay Transportation Secretary Joseph Emilio Abaya, nai-award na ang kontrata para sa 12 schindler escalators na ilalagay sa bawat istasyon ng tren.

Gayunman, sinabi ni Abaya na mananatiling problema pa rin ng mga pasahero ang mga sirang elevator dahil sa obsolete o lumang teknolohiyang ginagamit dito.

Sa halip aniya kasing palitan ang sirang piyesa, mas mainam na palitan na lamang ang kabuuan ng mga elevators na gagamitan ng makabagong teknolohiya.

Sa huli, muling humingi ng pang-unawa si Abaya sa publiko hinggil sa mga nararanasang problema sa MRT.

By Jaymark Dagala  

Hindi nababahala ang Malacañang sa sandaling walang kahinatnan ang mga kasong isinampa laban kay dating Pangulong Gloria Macapagal Arroyo.

Ito’y ilang buwan bago tuluyang matapos ang termino ni Pangulong Benigno Aquino III.

Ayon kay Deputy Presidential Spokesperson Abegail Valte, hindi naman ipinangako ng Pangulo na matatapos ang lahat ng malalaking kaso laban kay Ginang Arroyo sa loob ng administrasyong Aquino.

Binigyang diin pa ni Valte na malinaw ang pahayag ng Pangulo noon na hangad niya ring magkaroon ng resolusyon ang mga kaso tulad ng Maguindanao massacre.

Batid ng Palasyo ang dami ng mga sangkot sa kaso at matatagalan ang paglilitis dito.

By  Jaymark Dagala | Aileen Taliping (Patrol 23) 

Inaasahang makararating na sa bansa bago matapos ang taon ang dalawang biniling fighter jets ng Pilipinas.

Ayon kay Col. Enrico Canaya, Tagapagsalita ng Philippine Air Force, mismong si Air Force Commander Lt. Gen. Jeffrey Delgado ang sumakay sa isa sa dalawang FA-50 fighter trainer jets nang magsagawa sila ng test flight.

May kakayahan ang dalawang bagong fighter jets na lumipad sa bilis na mach 1.5 o iyong tinatawag na super sonic flights na mas mabilis pa sa tinatawag na speed of sound.

Nagkakahalaga ang 2 bagong eroplano ng P18.9 million pesos matapos ide-commission na ng Air Force ang kanilang F5 jet fighters kamakailan.

By  Jaymark Dagala | Jonathan Andal  

Umalma ang mga opisyal ng barangay sa isinagawang clearing operations ng mga otoridad sa ilang kalsada sa Lungsod ng Maynila.

Ito’y bilang bahagi ng paglilinis ng Task Force Mabuhay Lane sa mga kalsada sa lungsod na magagamit bilang alternatibong ruta sa panahon ng Kapaskuhan.

Partikular na nilinis ng pinagsanib na puwersa ng PNP Highway Patrol Group o HPG gayundin ng Metro Manila Development Authority o MMDA ang bahagi ng Ayala Bridge mula sa España Blvd.

Nauwi sa pagtatalo ang dapat sana’y pag-uusap ng mga tauhan ng MMDA at ng mga opisyal ng barangay dahil sa bigong pakikipag-ugnayan o coordination.

Sa bahagi naman ng Quiapo Ilalim, maagang nilinis ng mga nagtitinda sa lugar ang kanilang mga panindang nakahambalang sa kalsada.

Ngunit, kapansin-pansin ang mga nakaharang na market stalls sa harap ng ginagawang Quinta Market.

By Jaymark Dagala | Aya Yupangco (Patrol 5)

Kinumpirma ng Chief Minister ng Sabah sa Malaysia na nakalaya na sa kamay ng hinihinalang Abu Sayyaf ang isa sa kanilang mga kababayan na dinukot noong buwan ng Mayo.

Sa official statement ni Sabah Chief Minister Musa Aman na inilathala ng Bernama News Agency, nagpasalamat ito sa tulong ng Filipino authorities upang makalaya sa kidnappers si Thien Nyuk Fun.

Tumanggi nang magbigay ng detalye si Musa kung paano nakalaya si Thien.

Si Thien kasama ang isa pang Malaysian national ay dinukot ng mga hinihinalang miyembro ng Abu Sayyaf sa isang restaurant sa Sabah noong buwan ng Mayo.

Pinakawalan ito ng kanyang kidnappers sa Jolo Sulu samantalang blangko pa ang otoridad sa kalagayan ng kasama niyang nadukot sa Sabah.

By Len Aguirre