Lima (5) katao kabilang ang isang menor de edad ang natagpuang patay sa isang apartment sa Baliwag, Bulacan.
Ayon sa report ng pulisya, kakausapin sana ng may-ari ng apartment ang nangungupahan sa lugar subalit pawang mga wala nang buhay dahil sa tama ng baril ang nakita nya sa second floor ng apartment.
Isa sa tinitignang anggulo ng pulisya ay kung may kaugnayan sa bentahan ng illegal drugs ang patayan at ung nagsisilbing drug den ang apartment.
By Len Aguirre
Haharap na bukas, November 11 sa Court of Appeals ang Iglesia ni Cristo upang sagutin at pasinungalingan ang mga kasong isinampa ng dati nilang ministro na si Lowell Menorca ll.
Ayon kay Atty. Patricia Ann Prodigalidad, abogado ng INC, 9 na testigo ang nakatakda nilang iprisinta bukas sa Court of Appeals sa pagpapatuloy ng pagdinig para sa petition for habeas corpus at ampara na inihain ni Menorca.
Kabilang di umano sa mga testigo ang dalawang security guard na magpapatunay na hindi puwesahang ikinulong sa INC Compound sa Quezon City si Menorca at ang kanyang pamilya.
By Len Aguirre
Nadiskubre ng mga siyentipiko na yelo sa halip na apoy o lava ang ibinubuga ng tila mga bulkan sa pluto.
Ayon ito kay Alan Stern, isa Planetary Scientist na kabilang sa team ng New Horizons Spacecraft ng nasa na umikot sa Pluto noong July 14.
Sa halip na mga nagbabagang mga bato, nagyeyelong tubig at iba pang klase ng ice tulad ng nitrogen, ammonia o methane ang maaari umanong ibuga ng bulkan sa Pluto.
Sinabi ni Stern na kasalukuyan pa rin ang transmission ng iba pang larawang kuha mula sa ibabaw ng pluto at nakatakda nila itong isapubliko sa hinaharap.
By Len Aguirre
Isang pulis Marikina ang nanuntok umano ng isang radio reporter ng himpilang DZRH.
Ayon sa nagrereklamong radio reporter na si Edmar Estabillo, nagtungo siya sa Marikina Police Headquarters para mangalap ng balita at tumingin sa blotter doon.
Hindi nagustuhan ni Estabillo ang pabalang na sagot nang naka-duty na si SPO2 Manuel Layson kaya’t nauwi ito sa pagtatalo.
Kuwento pa ni Estabillo, sinuntok umano siya at sinalya bago posasan at kaladkarin ni Layson patungo sa loob ng police headquarters.
Hindi rin umano nakaligtas ang drayber ni Estabillo na sinuntok rin makaraang kunan nito ng video ang insidente.
Ayon naman kay Marikina City Police Chief Senior Superintendent Vincent Calanoga, kanila nang iniimbestigahan ang akusasyon ng panununtok ng kanilang pulis sa naturang reporter.
By Ralph Obina
Hinahanap ng National Economic Development Authority o NEDA ang request mula sa pamahalaang panglunsod ng Tacloban sa Leyte.
Ito’y para sa pagkukumpuni ng nasirang water system ng lungsod na nagkakahalaga ng P2 milyong piso.
Ayon kay Deputy Presidential Spokesperson Abegail Valte, nakapagpalabas na ang gobyerno ng may P334 na milyong piso na ipinadaan sa Local Water Utilies Administration o LWUA batay sa Comprehensive Rehabilitation Plan.
Una nang iginiit ni Tacloban City Mayor Alfred Romualdez na hindi pa inaaprubahan ng gobyerno ang kanilang request kaya’t wala pa ring maayos na water system ang kanilang lungsod, 2 taon makaraang manalasa ang super bagyong Yolanda.
By Jaymark Dagala | Aileen Taliping (Patrol 23)
Wala nang pagkakataon pang makabawi si 8-Division World Champion Manny Pacquiao kay Floyd Mayweather Junior.
Ito ay matapos tuluyang tuldukan ni Mayweather ang posibleng rematch sa pagitan nila ni Pacquiao.
Giit ni Mayweather, wala nang dahilan pa para labanan niya ang Pambansang Kamao na hindi man lamang umubra sa kanya noong “May 2 bout” nila na tinaguriang Fight of the Century.
Naniniwala si Mayweather na pinapalutang lamang ng kampo ni Pacquiao ang posibleng rematch nila upang gamitin ang pangalan nito at magpataas ng rate sa laban.
Matatandaang nitong Setyembre nang tuluyang magretiro si Mayweather matapos ang matagumpay na laban kontra kay Andre Berto kung saan kanyang napanatili ang malinis na 49 wins – zero loss record.
By Ralph Obina
Nag-courtesy call si Chinese Foreign Minister Wang Yi kay Pangulong Benigno Aquino III sa Palasyo ng Malacañang.
Ito’y bilang bahagi ng kaniyang working visit kasabay ng nakatakdang pagdating sa bansa ni Chinese President Xi Jinping na kumpirmadong dadalo sa Asia Pacific Economic Cooperation o APEC Summit.
Hindi naman nagtagal ang pananatili ni Wang sa Palasyo at agad din itong umalis.
Una rito, nakipagkita rin ang Chinese Foreign Minister kay Philippine Foreign Affairs Secretary Albert del Rosario ngunit hindi tinalakay ang naging paksa ng kanilang naging pulong na tumagal ng isang oras.
Ngunit batay sa ulat ng pahayagang Straight Times, layon ng pagbisitang ito ni Wang Yi sa bansa ang bilateral talks sa pagitan ng Pilipinas at China sa harap ng sigalot sa pinag-aagawang teritoryo sa West Philippine Sea.
By Jaymark Dagala | Allan Francisco | Aileen Taliping (Patrol 23)
Photo from: gov.ph
Ipapasa bukas na bukas ng House Committee on Appropriations ang panukalang Salary Standardization Law na sinertipikang urgent ni Pangulong Noynoy Aquino.
Ayon kay House Appropriations Committee Chair Isidro Ungab, natanggap na nila ang liham ng Pangulo sa pamamagitan ni Budget Secretary Florencio Butch Abad na humihiling sa Kamara at Senado na ipasa agad ang naturang panukala para sa kapakanan ng mga empleyado ng gobyerno.
Sinabi ni Ungab na bukas ay magsasagawa sila ng pagdinig at ipapasa ang Salary Standardization Law na matagal nang natutulog sa kanilang komite.
By Ralph Obina | Jill Resontoc (Patrol 7)
Kumbinsido ang Armed Forces of the Philippines (AFP) na hindi lehitimong Lumads ang marami sa mga kasama sa Manilakbayan, ang di umano’y grupo ng Lumad na nag-caravan mula sa Mindanao upang iprotesta ang anila’y karahasang gawa ng militar sa kanilang lugar.
Ayon kay Brig. Gen. Joselito Kakilala, Hepe ng Civil Relations Service ng AFP, natatakot lamang ang grupong ito na mawalan ng pakinabang sa mga Lumad sa sandaling magtagumpay ang pagpapatupad ng Ancestral Rights and Indigenous Peoples Act of 1997.
Sa ilalim aniya ng batas ay nabibigyan ng ancestral domain ang mga Lumad ng hanggang 5,000 ektarya ng lupain.
Sinabi ni Kakilala na nangangamba ang New People’s Army o NPA lalo na sa Surigao del Sur dahil marami sa mga Lumad ang hindi na sumusunod sa kanila lalo na sa isyu ng pangongolekta ng revolutionary tax sa mga mining firms.
“Dapat ang manok puti ang gagamitin, eh colored yung manok eh, may kulay yung manok hindi puwede yan sa mga Babaylan eh, ibig sabihin na hindi talaga mga original na mga Lumads yan, hindi mga legit Lumads, infact yung iba nga lider ng mga kilusan nila, yung mga prente ng mga kabila eh.” Ani Kakilala.
Ayon kay Kakilala, noong 1994 ay nagkaroon ng kasunduan ang NPA at mga Lumads sa Surigao del Sur na ang mga katutubo ang magsisilbing kolektor ng revolutionary tax para sa mga rebelde.
Hindi aniya bababa sa tatlo hanggang apat na raang milyon kada taon ang koleksyon na puwedeng mawala sa NPA kung makukuha ng gobyerno ang simpatiya ng Lumads.
“Dinadala ng mga leftist ng militanteng grupo, gumagawa ng isyu kasi natatakot sila kapag makuha na namin ang Lumad sa gobyerno on our side, mawawalan na ng mga New People’s Army, ng mga kampo sa mga base nila doon sa mga ancestral domain ng NPA, yun ang kinatatakutan nila, sa 3 out 4 na NPA, 3 ang Lumads.” Pahayag ni Kakilala.
By Len Aguirre | Ratsada Balita
Lagda na lamang ng Pangulong Benigno Aquino III ang kulang para maging batas ang panukalang P2,000 dagdag sa buwanang pensyon ng mga senior citizens.
Ayon kay Bayan Muna Partylist Representative Neri Colmenares, hindi na dadaan sa Bicameral Conference Committee ang panukalang pag-amyenda sa Section 12 ng Social Security Act of 1997 dahil sinunod na lamang ng senado ang bersyong inakda niya sa House of Representatives.
Isinantabi ni Colmenares ang mga agam-agam na ang pagtaas ng pensyon ng mga senior citizens ay makadagdag sa sinasabing nalalapit na pagkaubos ng pondo ng SSS.
Umaasa si Colmenares na makahabol sa Pasko ang pagsasabatas sa dagdag pensyon na inaasahang magbibigay ng benepisyo sa tinatayang 2 milyong SSS pensioners.
“Hindi naman sinasabi ng SSS na maba-bankrupt siya, ang sinasabi ng SSS yung pondo niya up to 2029 lang eh sabi ko 2015 pa lang ngayon, 14 years away pa yan kasi napakababa ng kanilang collection rate, ang collection rate nila is 38 percent lang, ibig sabihin hindi nila nakokolekta lahat ng mga premium na siningil sa mga manggagawa so sabi ko sipag-sipagan lang sana ng SSS kahit kalahati lang ng dapat kolektahin, pag-prosecute syempre sa mga malalaking employers na hindi nagre-remit ng kontribusyon.” Pahayag ni Colmenares.
By Len Aguirre | Balitang Todong Lakas