June 2026

Matatanggap na ng mga kawani ng gobyerno ang ikalawang bahagi ng kanilang year-end bonus.

Ayon kay Budget Secretary Florencio Butch Abad, katumbas ito ng isang buwang suweldo ng mga manggagawa at may kaakibat pang P5,000 cash gift na una nang ipinangako ng pamahalaan.

Ilalabas ng DBM ang ikalawang bahagi ng year-end bonus ng mga kawani ng gobyerno sa ika-15 ng buwang kasalukuyan na nakapaloob sa mahigit P20 bilyong pisong pondo ng gobyerno na inilaan para rito.

Kabilang sa mga makatatanggap ng bonus ang lahat ng mga national government officials, regular na empleyado, temporary, casual o contractual, part-time o full time na nagtatrabaho sa gobyero ng hindi bababa sa apat na buwan sa pagitan ng Enero hanggang Oktubre ng taong ito.

By Jaymark Dagala 

Dapat igalang ng lahat ang naging pasya ng Korte Suprema nang ideklara nitong labag sa batas ang Enhanced Defense Cooperation Agreement o EDCA.

Ito ang binigyang diin ni Senador Koko Pimentel na nagsabing ang High Tribunal ang may final say o huling kamay sa ligalidad ng nasabing kasunduan.

Aniya, nagsisilbi aniyang referee ang Korte Suprema sa usapin dahil magkaiba ang pananaw ng ehekutibo at ng senado bilang siyang tagapagpatibay ng mga pinapasok na tratado sa ibang bansa.

Gayunman, iginiit ni Pimentel na kailangan pa rin ng kamay ng senado sa nasabing kasunduan upang makumpleto ang proseso at walang maging paglabag sa Saligang Batas.

By  Jaymark Dagala 

Aminado ang PNP Highway Patrol Group o HPG na suntok sa buwan ang isinasagawa nilang clearing operations sa mga Mabuhay Lanes.

Ito’y kung patuloy na magmamatigas at hindi makikipagtulungan ang mga opisyal ng barangay gayundin ang mga local government units.

Ayon kay PNP HPG Director C/Supt. Arnold Gunnacao, kadalasan kasing bumabalik ang mga pasaway na motoristang pumaparada sa mabuhay lanes na siyang nagdudulot ng pagsisikip ng daloy ng trapiko.

Kakaunti lamang ang kanilang mga tauhan gayundin ng puwersa ng MMDA kaya’t hindi nila kayang bantayan 24 oras ang 17 kalsadang itinalaga bilang alternatibong ruta.

Kasunod nito, nanawagan si Gunnacao sa mga lokal na pamahalaan na atasan ang kanilang mga opisyal ng barangay na tumulong para panatilihing maluwag ang Mabuhay Lanes.

By Jaymark Dagala | Jonathan Andal 

Nagsumite ng panukalang batas si Senate President Franklin Drilon na nag-uutos para sa weighted average increase na 45 percent sa kabuuang kompensasyon sa mga kawani ng gobyerno sa loob ng 4 na taon.

Layon nitong mahikayat ang mga kasalukuyang nagtatrabaho sa pamahalaan na manatili sa kanilang mga serbisyo at mailapit ang sahod ng mga kawani ng gobyerno sa suweldong tinatanggap ng mga manggagawa sa pribadong sector.

Tinatayang aabot sa mahigit 228 bilyong piso ang kakailanganing pondo sa loob ng 4 na taon.

Bukod sa umento sa buwanang sahod ng mga manggagawa sa gobyerno, nakasaad din sa Senate Bill 3009 ang mas pinainam na set ng mga benepisyo at allowances tulad ng 14th month pay, mid-year bonus at enhanced performance bonus na katumbas ng doble sa buwanang sahod.

By  Jaymark Dagala | Cely Bueno (Patrol 19)  

Umaasa ang Malacañang na makalulusot sa senado ang panukalang 2016 proposed national budget bago matapos ang taong kasalukuyan.

Sa harap na rin ito ng posibleng pagtutol ng ilang mga senador sa ilang probisyong nakasaad sa nasabing panukala na nagkakahalaga ng mahigit P3 trilyong piso.

Ayon kay Presidential Communications Secretary Herminio Coloma, mayroon hanggang Disyembre ang mga senador na siyang sapat na panahon para maipasa ang nasabing panukala.

Sa ganitong paraan, sinabi ni Coloma na magiging maayos ang fiscal management ng bansa at hindi na kailangan ng reenactment budget.

Ipinaalala ni Coloma na mula noong 2011 hanggang 2015, naipasa ng Kongreso ang pambansang pondo sa takdang panahon kaya’t may nagagamit agad na sapat na pondo ang gobyerno pagsapit ng Enero 1 ng bawat taon.

By  Jaymark Dagala | Aileen Taliping (Patrol 23) 

Nangangamba ang grupong Courage na mas maraming kawani ng gobyerno ang mapipilitang magbayad ng buwis.

Ito’y sa sandaling tuluyan nang maipasa ang panukalang Salary Standardization Law (SSL) na naglalayong taasan ang suweldo ng mga kawani ng gobyerno.

Sa panayam ng DWIZ kay Ferdinand Gaite, Pangulo ng Courage, maituturing na impraktikal ang nasabing panukala sa kasalukuyang panahon.

Kung itataas ang sahod, dapat ding isabay ang pagbabawas sa ipinapataw na buwis upang mas maramdaman ito ng mga manggagawa.

“Kung itataas ng 11,000 ang tantiya namin mas liliit yung bilang ng mga empleyado kung salary grade ang pagbabatayan na maco-cover ng tax exemption so baka mga salary grade 1 and 2 na lang ang exempted hindi gaya ngayon na hanggang salary grade 5, although tulad ng nabanggit iba-ibang application depende sa rehiyon.” Ani Gaite.

Bagama’t nagpapasalamat sila sa naging hakbang na ito ng administrasyon, sinabi ni Gaite na mas mainam pa rin kung isusulong ang national minimum wage na P16,000 sa lahat ng manggagawa mapa-pribado man o pampubliko.

“So ang tingin namin dito although we appreciate na merong recognition na kailangang itaas ang sahod pero itong instance na ito it is a matter of too little, too late and too prolonged.” Pahayag ni Gaite.

By Jaymark Dagala | Karambola  

Nakatakdang dinggin sa Nobyembre 24 ng International Arbitral Tribunal sa The Hague, Netherlands ang kasong isiinampa ng Pilipinas laban sa China.

Kaugnay ito sa iringan ng dalawang bansa hinggil sa agawan sa teritoryo sa West Philippine o South China Sea,

Ayon sa Department of Foreign Affairs o DFA, magtatagal ang deliberasyon sa usapin hanggang sa katapusan ng buwang ito.

Bagama’t hindi kinikilala ng China ang ginagawang arbitration ng United Nations, itutuloy pa rin ng Tribunal ang kanilang pagdinig sa kaso at asahang magkakaroon ng pinal na desisyon sa susunod na taon.

By  Jaymark Dagala