June 2026

Kuntento ang mga opisyal ng China sa seguridad na ikinakasa ng Philippine National Police (PNP) at Armed Forces of the Philippines (AFP) kaugnay sa APEC Summit.

Ayon ito kay PNP Chief Director General Ricardo Marquez matapos nilang ilatag ang seguridad kasunod na rin ng mga bantang kilos protesta kaugnay sa isyu ng West Philippine Sea.

Sinabi ni Marquez na tiwala ang China na maayos na natugunan ang kanilang concern sa mga kilos protesta matapos ang security briefing .

Hindi lamang aniya China kundi maging ang ibang bansa ang nagpahayag ng concern sa seguridad na mahigpit naman aniya nilang tinututukan.

By  Judith Larino 

Sisimulan na ng Arbitration Court sa Nobyembre 24 ang pagdinig sa reklamo ng Pilipinas laban sa China kaugnay ng sigalot sa West Philippine Sea.

Ayon sa Department of Foreign Affairs o DFA, ang isang linggong oral hearing ukol sa merito ng arbitration case ay matatapos sa November 30, 2015 sa The Hague.

Itinakda ang pagdinig kasunod ng desisyon ng UN Arbitration Tribunal na saklaw nito ang reklamo ng Pilipinas hinggil sa naturang gusot.

Sinasabing 90 percent ng West Philippine Sea ay inaangkin na ng China.

By Jelbert Perdez 

Blangko pa rin ang Philippine National Police (PNP) sa kaso ng pag-ambush kay Bulacan RTC Branch 84 Presiding Judge Wilfredo T. Nieves, habang patuloy pa rin ang follow-up operations ng PNP Bulacan sa nasabing kaso.

Si Nieves ay nakatalaga sa special court na humahawak sa mga heinous crimes at drug-related cases sa Bulacan.

Ayon kay Col. Arwin Molina Tadeo, hepe ng PNP Malolos, may na-recover ng isang bala ang crime laboratory service sa sasakyan ni Judge Nieves.

Isasailalim naman sa ballistic examination ang bala na na-recover para matukoy ang ginamit na baril sa pagpaslang kay Nieves.

Hindi naman masagot ng PNP kung may kinalaman nga ang pag-ambush sa isang lider ng carnapping syndicate na sinentensyahan noon ni Nieves.

“Wala pa po tayong ebidensiya na patungo doon kaya nga patuloy po ang ating pagsasaliksik at pag-iimbestiga natin at lahat ng anggulo ay ating tinitignan para maka-build tayo ng isang kaso.” Pahayag ni Tadeo

By  Mariboy Ysibido | Balitang Todong Lakas

Isang traffic enforcer ng Quezon City Department of Public Order and Safety ang patay matapos barilin ng security guard habang nagsasagawa ng clearing operations sa Mabuhay Lane.

Kinilala ang biktima na si Enrique Fresnido na kabilang sa katuwang ng Metro Manila Development Authority sa clearing operation sa West Avenue, dakong alas-8:00 kaninang umaga.

Tinangkang kumpiskahin ni Fresnido ang motorsiklo ngunit nagmatigas si Batacan habang nagmatigas ang biktima kaya’t bumunot na ng calibre 38 revolver ang gwardya at binaril sa ulo ang traffic enforcer.

Naisugod pa sa Quezon City General Hospital si Fresnido subalit binawian din ng buhay dakong alas-9:00.

By  Drew Nacino 

Kumpiyansa pa rin ang Department of Tourism (DOT) na matatag pa rin ang sektor ng turismo sa bansa.

Ito ay sa kabila ng kaliwa’t kanang batikos na ibinabato ngayon sa Ninoy Aquino International Airport dahil sa isyu ng laglag bala scam.

Ayon kay Tourism Secretary Ramon Jimenez, mataas pa rin ang domestic at foreign tourist arrival sa bansa.

Kaugnay nito, naniniwala si Jimenez na maaabot at malalagpasan pa ang target ng pamahalaan na 10 milyong tourist arrival para sa 2015.

Batay sa tala ng DOT, koreano ang may pinakamalaking bilang ng mga turistang bumibisita sa bansa.

By  Ralph Obina | Aya Yupangco (Patrol 5)