June 2026

Hindi pa maaaring pagbotohan ang Salary Standardization Bill Committee Report kahit pa naipasa na ito sa Approriations Committee Level ng House of Representatives.

Ayon kay Buhay Partylist Rep. Lito Atienza, hangga’t walang chorum sa Kamara ay malabong pagbotohan ang nasabing panukalang batas.

Iginiit ni Atienza na kahit pumapabor sa mga manggagawa ang Salary Standardization Bill ay dapat pa ring magkaroon ng sapat na bilang ng mga mambabatas upang pagbotohan ang panukala.

Una ng nangako si Committee Chairman Isidro Ungab na kanilang bibilisan ang proseso ng pagsalang sa Plenary Committee Report.

By  Drew Nacino | Jill Resontoc (Patrol 7)  

Pinaalalahanan ng Philippine Embassy sa Libya ang mga OFW na walang isasagawang repatriation sa susunod na buwan.

Sa katunayan, ipinabatid ng embahada na ang huling embassy sponsored repatriation sa taong ito ay ipapatupad sa November 26.

Kasunod na rin ito nang mahirap at mahigpit na booking flights lalo nat nasa alert level 4 ang sitwasyon ng nasabing bansa.

Dahil dito, hinimok ng embahada ang mga OFW sa Libya na samantalahin na ang repatriation nila.

Mahigpit na minomonitor ng DTI o Department of Trade and Industry ang bentahan ng mga Christmas lights.

Kasunod na rin ito ng mga report na substandard na Christmas lights ang naibebenta sa ilang lugar partikular dito sa Metro Manila.

Nabatid na ibinibenta ng P60 hanggang P80 kada pakete ang Christmas lights na may peke o walang ICC sticker gayung ang ligtas na Christmas lights ay nabibili mula P300 hanggang P500 kada pack.

Tiniyak ng DTI ang pagpapatupad ng safety standards sa mga Christmas lights.

Hindi pabor si dating Ambassador at OFW Family Club Partylist Representative Roy Señeres na ma-disqualify sa 2016 presidential elections si Senador Grace Poe.

Binigyang diin ni Señeres na dapat maresolba ang mga duda pabor sa isang foundling na tulad ng senadora.

Kasabay nito, ipinahiwatig ni Señeres ang posibleng pag-atras sa presidential elections para suportahan si Poe.

Sinabi ni Señeres na makikipag-usap siya kay Poe kung tatanggapin nito ang kanilang plataporma na pangunahin ang pagsusulong ng karapatan ng mga manggagawa.

Ipinaabot ni Señeres ang paghanga kay Poe na aniya’y walang bahid o walang korupsyon.

By  Judith Larino 

Hiniling sa Korte Suprema ng isang dating US Senator na ipawalang-bisa ang nilagdaang Enhanced Defense Cooperation Agreement o EDCA sa pagitan ng Pilipinas at Amerika.

Sa isang petisyon, binigyang diin ni dating US Sen. Mike Gravel na ang bilateral deal ay labag sa treaty clause ng 1987 Constitution at hindi makabubuti sa mga Pinoy at mga Kano.

Bukod pa rito, hiniling din ni Gravel sa mataas na hukuman na utusan si Pangulong Noynoy Aquino na i-transmit ang EDCA sa Senado dahil ito ang nakasaad sa Saligang Batas.

By Jelbert Perdez 

Hindi i-uurong ng Pilipinas ang territorial claims nito sa West Philippine Sea na nakasampa sa Arbitration Court.

Ayon kay Foreign Affairs Spokesman Charles Jose, ang arbitration ay ang pinakamapayapa at pangmatagalang solusyon sa gusot sa naturang teritoryo.

Inaangkin ng Beijing ang halos buong rehiyon kung saan kabilang sa mga sinasagasaan ng claims nito ang Vietnam, Pilipinas, Taiwan, Malaysia at Brunei.

Magugunitang nagdesisyon na ang Arbitration Court noong isang buwan na may kapangyarihan itong dinggin ang reklamo laban sa China.

By  Jelbert Perdez  

Mawawalan ng supply ng tubig ang mga customer ng Maynilad sa ilang lugar sa Muntinlupa, Las Piñas, Parañaque, at Imus City sa Cavite ngayong araw hanggang bukas, Nobyembre 13.

Ayon kay Maynilad Spokesperson Grace Laxa, ito’y bunsod ng isasagawang service improvement project sa ilang bahagi ng mga naturang lungsod.

Sa Las Piñas City, mula alas-12:00 mamayang tanghali hanggang alas-12:00 bukas ng tanghali ay tatamaan ng water service interruption ang Almanza Uno, Almanza Dos, Talon Uno, at Talon Tres.

Sa Muntinlupa City naman ay maaapektuhan ang Alabang maliban sa Hi-Way Homes, Ayala Alabang, Buli, Cupang, Poblacion (NHA Southville 3), Sucat, at Tunasan.

By  Jelbert Perdez