June 2026

Itinanggi ng Philippine Charity Sweepstakes Office (PCSO) na umaabot sa P60 bilyong piso ang nawawalang kita mula sa STL o Small Time Lottery na pinatatakbo ng PCSO.

Ayon kay PCSO general Manager Ferdinand Rojas, mismong sa hearing ng senado ay pinabulaananan ng National Bureau of Investigation na nagmula sa kanila ang report na nalathala sa Philippine Daily Inquirer.

Ipinaliwanag ni Rojas na ang 4.7 billion remittance sa kanila mula sa STL operations ay mula lamang naman sa 14 na maliliit na lalawigan at apat na syudad.

Aminado si Rojas na walang resibo ang STL kaya’t mahirap matantiya kung magkano ang tunay na kita sa operasyon nito.

“Makapag-expand po kami sa ibang areas in order to get a bigger share, kasi when you say 4.7 you’re only talking of some areas, wala po tayo sa Metro Manila, wala po tayo diyan, wala po kami sa Pangasinan, sa Ilocos Sur, sa Abra, sa Baguio.” Ani Rojas.

By Len Aguirre | Karambola 

Sa kabila ng mainit na batuhan ng putik, pinasalamatan pa rin ni Vice President Jejomar Binay ang kaniyang mga katunggaling sina Senador Grace Poe at dating Secretary Mar Roxas.

Kasabay ito ng pagdiriwang ng kaniyang ika-73 kaarawan kahapon kung saan, simpleng pagbati lamang ang ipinaabot ni Poe habang kinantahan naman siya ni Roxas.

Magugunitang pinili ng Bise Presidente na ipagdiwang ang kaniyang kaarawan kasama ang mga mahihirap na pamilya sa Pasay kahapon.

At nang tanungin kung ano ang kaniyang birthday wish, tanging sinabi lamang nito ay ang umunlad ang buhay ng mga Pilipino.

By Jaymark Dagala | Allan Francisco  

Ibinalik na sa mga pulis ang pagbabantay sa paligid ng PNP General Headquarters sa Kampo Crame.

Ito’y ayon kay PNP Spokesman C/Supt. Wilben Mayor ay dahil sa mapapaso na sa Nobyembre 27 ang kontratang pinasok ng PNP sa kinuha nitong security agency.

Mangangailangan muling buksan ang public bidding para kunin ang serbisyo ng mga security agency na magbabantay sa paligid ng kampo.

At dahil sa matagal ang proseso ng public bidding kaya’t kinakailangan ani Mayor na ibalik muna ang kanilang mga uniformed personnel upang hindi malagay sa alanganin ang seguridad ng kampo.

By  Jaymark Dagala | Jonathan Andal  

Idineploy na ang karagdagang mga tauhan ng Manila Police District (MPD) sa US Embassy sa Roxas Boulevard sa Maynila.

Ito ay para sa pagpapatupad ng mas mahigpit na seguridad sa inaasahang kilos protesta ngayong tanghali ng grupong Bagong Alyansang Makabayan o bayan kaugnay ng APEC Summit.

Una rito, magsasagawa ng caravan ang grupong bayan sa Chinese Consulate at Japanese Embassy saka didiretso sa embahada ng Estados Unidos.

By  Ralph Obina 

Tinurukan na rin ng anti-flu vaccine ang mga pulis na tututok sa seguridad sa idaraos na Asia Pacific Economic Cooperation o APEC Summit sa susunod na linggo.

Ito’y bilang pagtiyak na malusog at handa ang mga pulis na nakatalagang magbantay sa venue ng pulong.

Pumila ang mga PNP Personnel sa APEC Command Center sa Mall of Asia Complex sa Pasay City upang magpa-bakuna.

Samantala, muling tiniyak ni PNP Chief Dir. Gen. Ricardo Marquez na kanilang ipatutupad ang maximum security sa susunod na linggo.

By   Drew Nacino | Allan Francisco