June 2026

Panahon na upang maglagay ng mga paalala sa paligid ng mga paliparan hinggil sa mga nangyayaring insidente ng tanim-laglag bala sa Ninoy Aquino International Airport (NAIA).

Ayon kay dating Metropolitan Manila Development Authority (MMDA) Chairman Francis Tolentino, dapat ding maglagay ng mga CCTV cameras ang mga otoridad upang matiyak na hindi matataniman ng bala ang bagahe ng mga pasahero.

Giit pa ni Tolentino, dapat masuri na ang mga bagahe ng mga pasahero bago pa lamang pumasok ng mismong paliparan na siya umanong pinangyayarihian ng nasabing modus.

Una nang nagpaalala ang Overseas Workers Welfare Administration o OWWA sa mga uuwing OFW na mag-ingat upang hindi mabiktima ng mga kawatan na ang layunin ay gumawa ng pera.

By Jaymark Dagala | Raoul Esperas (Patrol 45) 

Dapat talakayin ng iba’t ibang bansa sa gagawing Asia Pacific Economic Cooperation o APEC Summit ang mga planong nakalatag para labanan ang climate change.

Ito ang panawagan ng United Nations sa isinagawang Climate Vulnerable Forum na isinagawa rito sa Pilipinas.

Ayon kay Haoling Xu, Director ng Regional Bureau for Asia and the Pacific ng UN Development Programme, mahalagang tiyakin ang kahandaan ng tao gayundin ng mga imprastraktura sa pagtama ng mga kalamidad.

Binigyang diin ng opisyal na walang paglago ng ekonomiya kung hindi magiging matatag ang isang bansa laban sa mga sakuna.

Inihalimbawa pa ni Hao ang Pilipinas na mabilis na nakabangon sa pinsalang idinulot ng super bagyong Yolanda noong 2013.

By  Jaymark Dagala  

Hinihintay maging ng United States government ang magiging pasya ng Korte Suprema ng Pilipinas hinggil sa Enhanced Defense Cooperation Agreement o EDCA.

Ayon kay US Ambassador to the Philippines Philip Goldberg, umaasa silang mabibigyang linaw ang nilagdaang kasunduan sa pagitan ng Estados Unidos at ng Pilipinas sa pagpapalakas ng ugnayang military.

Iginiit ni Goldberg na maganda ang mga nakalatag na plano sa nasabing kasunduan at kanila itong ipatutupad sakaling ideklarang naaayon sa Saligang Batas.

Sa ilalim aniya ng kasunduan, binibigyan ng greater access ang Estados Unidos sa Pilipinas sa mga kampo militar gayundin sa pagtatayo ng mga pasilidad tulad ng taguan ng armas.

By Jaymark Dagala

Umaasa ang mga netizens na pakikinggan ng Canadian government ang petisyon ng grupong change.org.

Kaugnay ito sa panawagang ibalik sa kanilang bansa ang tone-toneladang basura na itinapon nito sa Pilipinas.

Hiniling ng mga netizens sa bagong prime minister ng Canada na si Justine Trudeau na gumawa ng karampatang aksyon sa suliranin.

Tinatayang nasa halos 40,000 na ang nakalap na lagda ng grupo sa kasalukuyan o malapit na sa target nilang 50,000 lagda.

By  Jaymark Dagala  

Mariing kinondena ng Korte Suprema ang ginawang pananambang sa hukom ng Malolos Regional Trial Court na si Wilfredo Nieves.

Sa isang kalatas na ipinalabas ng mga mahistrado sa pangunguna ni Chief Justice Maria Lourdes Sereno, hindi katanggap-tanggap ang nangyari kay Nieves lalo’t ginagampanan lamang nito ang kaniyang tungkulin.

Dahil dito, handa ang Supreme Court na maglaan ng pabuya para sa sinumang makapagtuturo sa sinumang nasa likod ng pagpatay sa hukom.

Pauwi na si Nieves nang tambangan ito ng riding in tandem sa tapat ng isang traffic light sa barangay Tikay, Malolos, Bulacan kagabi.

By  Jaymark Dagala  

Dapat ikunsidera ng pamahalaan ang paggamit sa Subic at Clark Airport para sa 2,000 flights na apektado ng APEC Summit.

Ayon kay dating Senador Richard Gordon, kayang-kayang i-accomodate ng dalawang paliparan ang mga kanseladong flights.

Matagal na panahon aniyang ginagamit ng isang cargo company ang Subic Airport at nakakaya naman ang araw-araw na operasyon nito.

Sinabi pa ni Gordon na minsan na ring nagsilbi bilang Chairman ng Subic Bay Metropolitan Authority o SBMA na hindi lamang sa panahon ng APEC dapat ito pag-aralan ng gobyerno dahil lingid naman sa lahat na congested na ang kasalukuyang Ninoy Aquino International Airport o NAIA.

By Jaymark Dagala  

Nangangamba ang VACC o Volunteers Against Crime and Corruption na tuluyang ma-dismiss ang mga kasong nakasampa laban sa mga crime syndicates tulad ng Dominguez Carnapping Group.

Ayon kay Boy Evangelista, miyembro ng VACC at ama ni Venzon Evangelista, ang car dealer na hinihinalang pinatay ng Dominguez Carnapping Group, may matinding mensahe na gustong ipadala ang grupong nasa likod ng pagpatay kay Bulacan RTC Judge Wilfredo Nieves.

Si Judge Nieves ang humatol kay Raymond Dominguez, isa sa mga sinasabing lider ng Dominguez Carnapping Group na di umano’y pumatay sa anak ni Evangelista.

Sinabi ni Evangelista na batay sa kanilang research, wala namang ibang high profile case na hawak o hinawakan si Nieves maliban sa Dominguez Carnap Group.

Noong 2012 aniya ay may apat na testigong napatay maliban pa sa isang complainant witness sa Malolos RTC na tinambangan rin matapos ang isang hearing sa korte.

“They are sending a very strong message na kapag gumawa ka ng isang desisyon na maco-convict sila ay meron kang paglalagyan.” Pahayag ni Dominguez.

By  Len Aguirre | Ratsada Balita