June 2026

Nanindigan si French President Francois Hollande na ipagpapatuloy nila ang “walang awang” pag-atake sa Islamic State of Iraq and Syria o ISIS.

Ito’y bilang ganti makaraang akuin ng ISIS ang pamamaril at suicide bombing sa Paris, France na ikinasawi na ng 127 katao.

Idineklara rin ni Hollande ang 3 araw na national mourning at inilagay sa pinaka-mataas na lebel ang seguridad ng bansa.

Isa anyang “an act of war” ang inilunsad na pag-atake ng ISIS na hindi nakatulong upang matigil ang digmaan sa Syria at Iraq bagkus ay lalo nitong  patitindihin ang airstrike sa Middle East.

Iginiit ni Hollande na pansamantala nilang kalilimutan ang salitang “awa sa mga kalabang barbaro sa Gitnang Silangan” at tiniyak na walang ititirang buhay hanggang sa maubos at malipol ang lahat ng  miyembro ng ISIS.

By: Drew Nacino

Inako na ng  Islamic State of Iraq and Syria o ISIS ang pamamaril at pambobomba sa Paris, france na ikinasawi ng 127 katao.

Ayon sa ISIS, 8 nilang kapanalig ang nagsuot ng explosive belts at nagbitbit ng mga baril upang ilunsad ang pag-atake na binasbasan ni Allah laban sa Pransya.

Nagbabala rin ang teroristang grupo na masusundan ang mga pag-atake sa France hangga’t ipagpapatuloy nito ang  airstrike sa Syria.

Kabilang ang France sa kowalisyon na pinangungunahan naman ng Amerika na nagsasagawa ng airstrike sa mga teritoryong sakop ng ISIS.

By: Drew Nacino

Apat (4) katao ang patay sa sunog sa isang residential area sa Sampalukan, Caloocan City.

Ayon sa SOCO o Scene of the Crime Operatives, nagsimula ang sunog sa bahay ng isang Virginia Norbete sa Don Benito Street dahil sa umano’y naiwang nakasinding kandila.

Inamin ng mga bumbero na hirap silang apulain ang sunog na umabot ng fourth alarm at tumupok ang 30 bahay dahil sa makikitid na daan.

Tatlo (3) katao ang sugatan sa naturang sunog na nakaapekto sa tinatayang 50 pamilya.

Posibleng umakyat pa ang death toll dahil ilang residente ang umano’y nawawala.

Tinatayang P3 milyong piso ang halaga ng danyos ng nasabing sunog.

By  Judith Larino

Tiniyak ng Department of Trade and Industry (DTI) na sapat ang supply ng noche buena products sa bansa.

Nag-ikot kahapon sa ilang supermarket sa lungsod ng Makati ang monitoring team ng DTI upang alamin ang supply ng noche buena items.

Tiniyak ng DTI sa pamamagitan ni Consumer Protection Bureau Director Anselmo Adriano, na walang problema kung kaya’t wala rin umanong inaasahang pagtaas sa mga presyo nito hanggang sa pagsapit ng Pasko.

Bukod dito, ayon pa kay Adriano marami umanong mga brands na maaaring pagpilian ng mga mamimili depende sa abot ng kanilang budget.

Kasabay nito, ipinaskil na rin ng DTI ang Suggested Retail Price (SRP) ng mga noche buena items na siyang magsisilbing gabay ng mga mamimili.

By  Mariboy Ysibido