June 2026

Nabulabog ng bomb threat ang isang terminal ng bus sa Baguio City.

Kasunod na rin ito nang natanggap na text message ng station master ng Victory Liner Bus na nagsasabing may bombang sasabog sa nasabing terminal.

Ito rin ang mensaheng natanggap ng isang dispatcher mula naman sa nagpakilalang nagtanim ng bomba.

Kaagad namang sumugod ang mga otoridad sa nasabing bus terminal at walang nakitang bomba.

By  Judith Larino  

Nagpasalamat si Pangulong Noynoy Aquino kay South Korean President Park Geun-Hye sa ibinigay nitong donasyon para sa Armed Forces of the Philippines (AFP).

Kabilang sa mga dinonate ng Presidente ng South Korea ang patrol combat corvette, landing craft utility at 16 na rubber boats na naglalayong mapahusay ang humanitarian assistance at disaster response capabilities ng AFP.

Sa panig naman ni Park, sinabi nito na umaasa siyang mas marami pang Korean companies ang tutulong sa AFP Modernization Program.

Kilala ang Korea bilang fourth largest shipbuilding country.

By  Meann Tanbio | Aileen Taliping 

Kumpiyansa ang gobyernong Amerika na makalulusot at malalagdaan ang Enhanced Defense Cooperation Agreement o EDCA sa harap ng patuloy na pagkabinbin nito sa Korte Suprema.

Sinabi ni United States President Barack Obama na batid nilang nasa Korte Suprema pa rin ang usapin sa EDCA matapos kuwestyunin ng ilang grupo dahil sa paniwalang paraan umano ito ng Amerika para makapagtayo muli ng kanilang base militar sa bansa.

Tinitiyak ni Obama na kapag mawala na ang mga balakid ay epektibong ipatutupad ang mga probisyon para sa mas matatag na ugnayang pang-depensa.

Sinabi rin ni Obama na malaki ang magiging papel ng EDCA sa bahagi ng kanilang target na ipagpatuloy ang pagtulong sa kanilang treaty ally na palakasin ang kapasidad sa defense system, humanitarian work at mapalakas ang koordinasyon ng iba pang mahahalagang aktibidad sa rehiyon.

“Solid rock” aniya ang suporta nila sa Pilipinas at para mas tumatag pa ito ay kailangang maipatupad ang EDCA.

By  Meann Tanbio | Aileen Taliping (Patrol 23) 

Inaasahang hawak na ng Department of Justice (DOJ) ang final report ng National Bureau of Investigation (NBI) kaugnay sa imbestigasyon nito sa laglag bala controversy.

Kasunod na rin ito, ayon kay Justice Spokesman Undersecretary Emmanuel Caparas nang pagsasa pinal ng task force talaba sa inimbestigahang kontrobersya sa NAIA.

Sinabi ni Caparas na babasahin muna nila kabuuan ng report at kung kinakailangan ay linawin ang mga detalye rito.

Tiniyak ni Caparas na kaagad naman nilang isasapubliko ang naturang NBI report matapos itong ma-review ng mga kinauukulang opisyal.

By Judith Larino

Isasalang sa DNA analysis ang bangkay ng Malaysian national na pinugutan ng Abu Sayyaf Group sa Jolo, Sulu.

Ipinabatid ito sa DWIZ ni Armed Forces of the Philippines (AFP) Spokesman Col. Restituto Padilla makaraang kumpirmahin na natagpuan na ang pugot na ulo ng biktimang si Bernard Then.

“Kinakailangan lang po naming kumuha pa ng DNA analysis para malaman kung ito ba talaga ang sinasabing bangkay ng nasabing Malaysian na napugutan, hindi pa po namin makukumpirma hanggat di namin nakukuha ang lahat ng datos na ito para makakasigurado tayo na ang sinasabing pagpugot nung bihag na Malaysian, yung taong yun nga ang nakuha nating bangkay.” Ani Padilla.

Tiniyak ni Padilla na nagpapatuloy ang pagtugis nila sa mga nasa likod ng pamumugot kay Then.

Una rito, kinondena ni Malaysian Prime Minister Najib Razak ang nasabing pagpugot at tinawag na barbaric at savage ni Razak ang ginawang ito ng mga bandido.

“Tuluy-tuloy naman po ang ating isinasagawang law enforcement operation at pagtugis sa mga kriminal na ito.” Pahayag ni Padilla.

By  Meann Tanbio | Ratsada Balita  

Nakatakdang maghain ng motion for reconsideration si Rizalito David sa Lunes, November 23.

Ito ay para hilingin sa Senate Electoral Tribunal na baligtarin ang nauna nitong desisyon nang ibasura ang disqualification case na isinampa niya laban kay Senador Grace Poe.

Para kay David, pakikisama lang kaya bumoto ang limang senador na pawang miyembro ng SET, pabor kay Poe.

Ito ay kinabibilangan nina Senador Tito Sotto, Loren Legarda, Bam Aquino, Cynthia Villar at Pia Cayetano.

Kasabay nito, nanawagan si David na patunayang hindi pulitika ang basehan ng kanilang boto sa pamamagitan ng pagpabor sa kanilang motion for reconsideration.

By Meann Tanbio