NASAKOTE ng awtoridad ang dalawang menor de edad dahil sa pagkakasangkot sa ilang insidente ng carnapping sa Quezon City.
Ayon sa Quezon City Police District o QCPD, hawak na nila ngayon ang lalaki at babaeng suspek na kapwa labimpitong taong gulang habang nakatakas naman ang isa pang kasawat ng mga ito.
Nabatid na nagsumbong ang isa sa mga biktima na sinasabing ninakawan ng isang van sa Barangay Holy Spirit.
Natunton ang isang suspek sa may bahagi ng Fairview kung saan maliban sa van, narekober din ng mga alagad ng batas ang isang jeep, isang sedan, dalawang motorsiklo, at isang tricycle.
Nabatid sa QCPD na ililipat sa pangangalaga ng Department of Social Welfare and Development o DSWD ang mga nahuling suspek.