Ikinatuwa ni Assistant Minority Leader at ACT Teachers Representative France Castro ang pagbasura ng Regional Trial Court o RTC ng Bayugan City, Agusan Del Sur sa mga aniya’y gawa-gawang kaso laban sa 16 na tagapagtanggol ng karapatang pantao mula sa Cagayan De Oro kabilang si ACT Union region X President Ophelia Tabacon.
Ayon kay Castro, ang pagbasura sa kaso laban kay Teacher Ophel ay isang malaking tagumpay para sa mga human rights defenders at mga guro na biktima ng patuloy na pangha-harass at red-tagging ng pwersa ng estado.
Aniya, patuloy nitong hihimukin ang DEPED na itigil na ang iba pang pagtatangka ng NTF-ELCAC na i-redtag at siraan ang mga unyon ng mga guro.
Matatandaang si Teacher Ophel ay isang pampublikong guro na aktibo sa pakikipaglaban sa karapatan at kapakanan ng mga guro at inakusahang miyembro ng NPA at binansagang maestra komunista. —ulat mula kay Tina Nolasco (Patrol 11)