Sampu (10) katao ang naiulat na nasawi dulot ng patuloy na madugong kilos protesta sa iba’t ibang siyudad sa Iran.
Ito ay kasabay ng tangkang pag – take over ng mga armadong demonstrador sa ilang mga estasyon ng pulis at militar sa nasabing bansa.
Batay ito sa ulat ng isang local state television sa Iran bagama’t wala nang ibinigay na iba pang detalye ukol dito.
Hindi din matiyak kung kabilang sa mga ito ang dalawang (2) tao na napaulat na binaril sa bayan ng Izeh.
Nag – ugat ang itinuturing na pinakamalaking kilos protesta sa Iran simula noong 2009 sa panawagang tutukan ng kanilang pamahalaan ang paglikha sa mga trabaho sa halip na makisali sa giyera sa Iraq at Syria.
Gayundin ang alegasyon ng korapsyon ng pamahalaan ng Iran at pagbaba ng kanilang ekonomiya.
