Mariing itinanggi ng House Prosecution Panel na may natatanggap silang pressure kaya nila iniatras ang pagtestigo kay dating Senador Antonio Trillanes IV sa impeachment trial ni Vice President Sara Duterte.
Reaksyon ito ni House Lead Prosecutor Gerville Luistro sa pahayag ni Trillanes sa kanyang X account na hiniling niyang pormal nang bawiin ang kanyang pangalan bilang testigo para maibsan ang pressure sa prosecution.
Ayon kay Luistro, mas mainam na tanungin si Trillanes kung ano ang tinutukoy nitong pressure sa kanyang post at bakit mas pinili nitong maalis sa listahan ng mga testigo.
Iginiit ni Luistro na wala silang naramdamang pressure mula sa mga senator-judge at hindi ito ang dahilan ng pag-atras ni Trillanes sa pagtestigo sa Article 2, na tumatalakay sa hindi maipaliwanag na yaman ni VP Sara.
Aniya, ang “pressure” na alam niya ay ang marami pang testigo at gabundok na dokumentong kailangang ipresenta ng prosecution sa impeachment trial. | Sa panulat ni Geli Mendez
