Target ng Kamara na mag-realign ng pondo para maitaas ang budget ng Department of Public Works and Highways o DPWH sa taong 2027.
Ito ang sinabi ni House Appropriations Vice Chairperson at Surigao del Sur Rep. Romeo Momo, na batay sa panukalang 2027 national budget, nasa 643.95 billion pesos ang alokasyon para sa DPWH.
Ayon sa kongresista, batay sa pagtataya, kailangan ng mahigit isang trilyong pisong investment para sa mga infrastructure project na dapat makumpleto, lalo na ang mga malalaking proyekto sa flood control.
Sinabi ni Momo na kailangan ding maitaas ang “spending” o paggastos, dahil ang DPWH ang itinuturing na “engineering arm” ng pamahalaan at tagapagpatupad ng mga proyektong pang-imprastraktura.
Tiniyak naman ni Momo na hindi babawasan ang pondo para sa edukasyon, kalusugan at social services, at sa halip ay dadagdagan pa ito.
Sa pahayag naman ni Quezon Rep. Reynante Arrogancia, ang vice chairperson din ng komite, susuriin ang mga pondo ng mga ahensyang may infrastructure projects, gayundin ang mga hindi nagagamit na pondo, para matukoy kung alin ang maaaring i-realign. | mula sa panulat ni Geli Mendez
