Naniniwala si dating Senador Koko Pimentel na ang “OPEN governance” ang susi upang mapabuti ang pamamahala at mapaunlad ang Pilipinas.
Ayon kay Pimentel, mahalagang maisama sa pamamahala ang iba’t ibang sektor, lalo na ang mga non-government organizations (NGOs) at mga grupong laban sa korapsyon, upang matiyak ang mas bukas at transparent na gobyerno.
Ipinaliwanag din niya ang konsepto ng OPEN, kung saan ang “O” ay tumutukoy sa Order o mahigpit na pagpapatupad ng batas, na aniya’y hindi dapat ituring na optional ang pagsunod sa batas. Ang “P” naman ay Productivity, na aniya’y mahalaga upang mapalakas ang produksyon ng bansa at makatulong sa pagtugon sa inflation sa pamamagitan ng pagdami ng mga produktong maaaring bilhin ng publiko.
Para naman sa “E” o Education, binigyang-diin ni Pimentel ang pangangailangang pagbutihin ang kalidad ng edukasyon sa bansa. Aniya, bagama’t naipapasa ang mga estudyante sa mas mataas na antas, marami pa rin ang kulang sa kaalaman at kasanayan sa pagbasa, matematika, at agham.
Samantala, ang “N” ay para sa Nationalism, o pagmamahal sa bansa. Iginiit niya na masyadong self-centered and mga Pilipino at pagsasantabi ng pansariling interes para sa kapakanan ng nakararami.
Dagdag pa niya, na kung pagtutuunan ng pansin ang apat na prinsipyong ito, magkakaroon ng matibay na pundasyon ang Pilipinas tungo sa pangmatagalang pag-unlad.
