Handang ipagkaloob ng pamilya Villar ang kanilang lupang kakailanganin upang maresolba ang isyu sa right-of-way (ROW) ng Light Rail Transit Line 1 (LRT-1) Cavite Extension sa bahagi ng Las Piñas.
Ayon kay Transportation Secretary Giovanni “Banoy” Lopez, nagpahayag umano ang mga Villar ng intensyon na i-donate ang kanilang property para makatulong sa pagpapatuloy ng proyekto.
Kasunod ito ng ulat na sinusuri ng Office of the Ombudsman ang alegasyon ng umano’y pakikialam nina Senators Mark at Camille Villar sa itinakdang alignment ng proyekto. Itinanggi naman ng magkapatid ang paratang at iginiit na handa silang humarap sa anumang imbestigasyon.
Matatandaang inatasan ni Pangulong Ferdinand “Bongbong” Marcos Jr. si Lopez na agad lutasin ang mga hadlang sa ROW upang mapabilis ang pagkumpleto ng LRT-1 extension hanggang Cavite.
Target ng Light Rail Transit Authority (LRTA) na matapos ang buong proyekto bago matapos ang termino ng administrasyong Marcos sa 2028.
Operational na ang Phase 1 ng LRT-1 Cavite Extension na nagdurugtong sa Baclaran Station at Dr. Santos Station sa pamamagitan ng limang bagong istasyon: Redemptorist-ASEANA, MIA Road, PITX, Ninoy Aquino Avenue, at Dr. Santos.
Samantala, nakatakdang ipagpatuloy ang pagpapalawig ng linya patungong Cavite sa ilalim ng Phase 2 at 3, kung saan itatayo pa ang mga istasyon sa Las Piñas, Zapote, at Niog.
