Isang sport utility vehicle (SUV) ang nagliyab sa bahagi ng EDSA, kanto ng Pinatubo St. sa Mandaluyong City na nagdulot ng mabigat na daloy ng trapiko sa nabanggit na lugar.
Ayon sa may-ari ng suv na si Ferdinand Damian, paakyat na sana siya sa EDSA mula sa Pinatubo St. nang biglang huminto ang minamaneho niyang sasakyan.
Dito na bumaba si Damian para itulak ang kaniyang sasakyan pero bigla na lamang itong nagliyab.
Base sa mga tauhan ng Mandaluyong Police Station, nagtulong-tulong ang mga residente na nasa malapit na establisyimento para apulahin ang nasusunog na sasakyan hanggang sa dumating ang mga bumbero mula sa BFP, Red Cross at MMDA.
Patuloy pang iniimbestigahan ang naganap na insidente partikular na ang pinagmulan ng apoy.
