Nanawagan ang FEF o Foundation for Economic Freedom sa pamahalaan na suspendihin muna ang pagpapatupad ng 85 pesos minimum wage increase sa Metro Manila habang isinasagawa ang mas malalim na pagsusuri.
Ayon sa grupo, bagama’t layunin ng umento sa sahod na makatulong sa mga manggagawa, maaari itong magdulot ng hindi inaasahang epekto tulad ng pagtaas ng presyo ng mga pangunahing bilihin at pagkawala ng trabaho.
Iginiit ng FEF na mas mataas ang itinakdang umento kaysa sa paglago ng productivity, kaya posibleng ipasa ng mga negosyo sa mga mamimili ang dagdag na gastos sa paggawa.
Nagbabala rin ang grupo na maaaring magbawas ng empleyado o oras ng operasyon ang mga kumpanya, lalo na ang mga micro, small and medium enterprises, na nahaharap na rin sa mataas na gastos sa operasyon dulot ng pagmahal ng langis.
Binigyang-diin ng FEF na ang kombinasyon ng umento sa sahod at tumataas na gastos ng mga Pilipino, ay posibleng humantong sa pagbilis ng inflation at mas mabagal na paglago ng ekonomiya. | mula sa panulat ni Jordan Gutierrez
