Nakadepende sa itatagal ng cross-examination ng defense panel kay National Bureau of Investigation (NBI) Regional Director Atty. Jeremy Lotoc kung maisasalang pa ngayong Day 5 ng impeachment trial si Office of the Vice President (OVP) Chief of Staff Atty. Zuleika Lopez.
Ito ang kinumpirma ni House Prosecution Legal Spokesperson Atty. Benjamin Tolosa Jr., na batay sa pahayag ng depensa kahapon, nasa kalahati pa lamang sila ng kanilang cross-examination kay Lotoc.
Ibig sabihin nito, posible ring tumagal ngayong araw ang gagawing pagtatanong ng depensa sa testigo ngayong hapon.
Dahil dito, inaasahang halos kaparehong oras pa ang gugugulin sa natitirang pagtatanong ng depensa.
Sinabi rin ni Tolosa na wala pang pinal na desisyon kung magsasagawa pa ang prosecution team ng redirect examination matapos ang cross-examination ng depensa.
Aniya, nakadepende rin sa magiging pasya ng Senate Impeachment Court kung pahihintulutan pang maisalang si Lopez sa witness stand bago matapos ang pagdinig ngayong araw. | via Geli Mendez (Patrol 30)
