Umapela ang Bantay Impeachment o BI Network sa senator-judges, House prosecution panel, at defense team na gawing mas malinaw at mas madaling maintindihan ng publiko ang impeachment trial ni Vice President Sara Duterte.
Ikinalugod ng grupo na sa wakas ay nagsimula na ang paglilitis, ngunit iginiit na dapat itong maging bukas at mas mailapit sa taumbayan.
Para sa Bantay Impeachment, dapat gamitin sa paglilitis ang maikli at malinaw na mga tanong, at hangga’t maaari ay gumamit ng wikang Filipino upang mas maraming mamamayan ang makasubaybay sa pinag-uusapan.
Ayon pa sa BI Network, mas dapat pagtuunan ng pansin ang mga usaping direktang may kaugnayan sa Articles of Impeachment kaysa sa mga teknikalidad, at iwasan ang labis na objections o delaying tactics upang mas mabilis na mailahad sa publiko ang mga ebidensya kaugnay ng mga akusasyon laban sa bise presidente.
Binigyang-diin ng BI Network na ang impeachment trial ay hindi lamang para sa mga abogado, kundi para sa bawat Pilipinong may karapatang malaman kung nararapat bang mapatalsik sa puwesto ang isang halal na opisyal na umano’y sumira sa tiwala ng taumbayan.
Naniniwala ang grupo na kung mga abogado lamang ang nakakaintindi sa impeachment trial, posibleng mawalan ng interes ang publiko at mabaon lamang sa limot ang tunay na layunin ng paglilitis na panagutin ang mga opisyal na sangkot sa katiwalian at sumira sa tiwala ng taumbayan. | via Geli Mendez (Patrol 30)
