Isinusulong ng pamahalaan ng Japan ang mga patakaran para sa mga dayuhan kung papaano magiging permanent resident ng naturang bansa ang mga ito.
Ayon sa inilabas na ulat ng Japanese Immigration Services Agency, nirerekomenda nito na sumailalim sa isang “Japanese Language and Lifestyle Learning Program” ang mga dayuhan nitong mga residente upang makamtan ng mga ito ang permanent residency at kahit Japanese citizenship.
Bukod pa anila ang nasabing programa sa iba pang requirement na dapat ding mapasa ng mga nais maging permanent resident sa Japan, tulad ng period of residence, sapat na sweldo, at pagtalima sa pagbabayad ng buwis.
Bagaman may mga kahalintulad nang programa sa Japan, layon ng panukala na gawin itong mandatory para sa lahat ng mga dayuhang nais manirahan sa naturang bansa. | mula sa panulat ni Anjo Riñon
