Kinumpirma ng Department of Justice na sasailalim sa preliminary investigation ang kinse-anyos na suspek na si alyas “Rod” kaugnay ng pamamaril sa isang paaralan sa Tacloban City.
Ayon kay Justice Undersecretary Ian Norman Dato, nahaharap ang menor de edad sa tatlong bilang ng murder at dalawang bilang ng attempted murder.
Nasa kustodiya pa rin aniya ng Department of Social Welfare and Development ang bata at kasalukuyang nakalagak sa Regional Rehabilitation Center for Youth sa Region 8.
Isinagawa ang inquest proceedings noong Hunyo a-bente kuwatro sa Office of the City Prosecutor ng Tacloban City bago isinailalim ang kaso sa regular na preliminary investigation.—sa panulat ni Jordan Gutierrez
