Binatikos ng Tindig Pilipinas ang isinasagawang pagtitipon ng Iglesia ni Cristo bilang suporta kay Senador Rodante Marcoleta.
Ayon sa grupo na sila ring organizer ng Trillion Peso March, hindi dapat gamitin ang malawakang kilos-protesta para ipagtanggol ang sinumang opisyal ng pamahalaan laban sa isinasagawang legal na imbestigasyon.
Iginiit ng Tindig Pilipinas na sa isang demokratikong bansa, walang opisyal ang dapat umasa sa mobilisasyon ng mga taga-suporta upang maimpluwensyahan o pagdudahan ang patas na pagpapatupad ng batas.
Kinuwestyon din ng grupo kung bakit kinakailangan ng isang pulitiko ang suporta ng napakaraming tao upang depensahan ang sarili sa isang imbestigasyon.
Nauna nang inanunsyo ni Ombudsman Jesus Crispin Remulla na ihahain ang kasong plunder sa Sandiganbayan ngayong Linggo laban kay Senador Marcoleta kaugnay ng hindi pagdedeklara ng 75 million campaign donation sa kanyang SALN.—sa panulat ni Jordan Gutierrez
