Pumanaw na ang paring dumamay kay Mary Jane Veloso habang nakapiit sa Indonesia.
Kinilala ng Society of Jesus, o mas kilala bilang mga Heswita, ang kanilang kasamahan na si Fr. Bernhard Kieser mula Germany, na namatay sa edad na 87 sa isang ospital sa Yogyakarta noong Hunyo 6.
Ayon pa sa mga Heswita, inihatid na rin si Fr. Kieser sa kanyang huling hantungan nito lamang Lunes, Hunyo 8.
Ipinanganak si Fr. Kieser sa Germany at dumating sa Indonesia noong 1963, kung saan nakilala siya sa paglilingkod niya sa mga preso ng Wirogunan Prison sa Yogyakarta, kung saan nakakulong si Veloso bago iniuwi sa Pilipinas noong 2024.
Matatandaang nakatakdang tanggapin ni Veloso ang parusang kamatayan noong 2015, ngunit umapela si dating Pangulong Benigno Aquino III sa Indonesia na iligtas siya mula sa death row upang magsilbi siyang witness sa kasong human trafficking na kinahaharap ng recruiter nito.
Minsan nang sinabi ni Veloso na nakatulong si Fr. Kieser sa pagpapalalim ng kanyang pananampalataya, lalo na noong nalaman niyang iuuwi siya sa Pilipinas upang ikulong sa Correctional Institution for Women sa Mandaluyong. | Anjo Riñon
