Ibinunyag ng isang pulis na nakatanggap siya ng bayad mula sa mga indibidwal na konektado sa mga naarestong Chinese national sa isang iligal na minahan sa Pantukan, Davao de Oro.
Ayon kay Police Staff Sergeant Solomon Anuden Junior, pamilya niya ang nakatanggap ng bayad na umaabot sa 140,000 pesos kada buwan mula sa mga Chinese national na konektado sa naturang operasyon.
Gayunman, mariing itinanggi ni Anuden na siya ang namamahala o nangangasiwa sa minahan.
Matatandaang nasa dalawampung Chinese national ang natimbog sa naturang operasyon, habang nakumpiska ang iba’t ibang kagamitan at materyales, tulad ng mga military uniform at pampasabog. —sa panulat ni Anjo Riñon
