Kinumpirma ng Climate Change Commission na may posibilidad na hanggang 30-percent ng Metro Manila ay maaaring permanenteng malubog sa tubig pagsapit ng 2040.
Ayon kay CCC Commissioner Rachell Anne Herrera, bunga ito ng pagtaas ng lebel ng dagat at mga bagyo na tumatama sa bansa.
Tinataya aniyang 160 kilometro kwadrado ng lupa sa National Capital Region ang maaaring maapektuhan, na naglalagay sa malaking bahagi ng Metro Manila sa panganib.
Dagdag pa Herrera, bagaman may mga patakaran at pamantayan na inilabas ang pambansang pamahalaan, kritikal ang implementasyon sa lokal na antas.
Dahil dito, nag-abiso ang C-C-C na magpatupad ng mga hakbang upang mabawasan ang epekto ng pagbaha at ihanda ang komunidad para sa pangmatagalang epekto ng climate change.
