Mariing itinanggi ng Armed Forces of the Philippines ang mga malisyosong haka-haka hinggil sa sinasabing plano na patalsikin sa puwesto si Pangulong Ferdinand Marcos Jr.
Ayon sa AFP, walang basehan, walang katotohanan, at malayo sa realidad ang mga paratang. Hindi nakasalalay sa pulitika o personalidad ang kanilang katapatan kundi sa Saligang Batas, Republika, at sambayanang Pilipino.
Sinisiguro ng militar na malinaw ang kanilang tungkulin na ipagtanggol ang mga demokratikong institusyon ng bansa at hindi makialam sa anumang alitang pampulitika.
Dagdag pa nila, pagsubok lamang ang mga tangkang idawit ang militar sa mga intriga upang maghasik ng pagkakawatak-watak at sirain ang tiwala sa pamumuno.
Pagtitiyak ng AFP, mananatili silang tapat sa tungkulin na may prinsipyo, disiplina, at katapatan sa watawat, Saligang Batas, at sa Republika.
