Mariing itinanggi ni dating House Speaker at Leyte Rep. Martin Romualdez ang pagkakadawit ng kanyang pangalan ni Orly Regala Guteza sa pagdinig ng Senate Blue Ribbon Committee.
Giit ni Romualdez, kasinungalingan ang pahayag ni Guteza na ilang maleta na naglalaman ng pera ang naihatid umano sa kanyang bahay, at tinawag itong walang basehan at desperadong hakbang para idikit siya sa umano’y kickback.
Binigyang-diin ng kongresista na imposibleng mangyari ang sinasabing delivery ng pera sa McKinley noong Disyembre 2024 dahil mula pa Enero 2024 ay nakasailalim na sa renovation ang naturang property, kung saan tanging mga construction worker lamang ang naroon.
Ayon kay Romualdez, malinaw na may bahid ng pulitika ang mga paratang at iginiit niyang hindi niya kailanman pinagtaksilan ang taumbayan, tumanggap o nakinabang sa anumang kickback mula sa proyekto ng gobyerno.
Dagdag pa niya, hindi rin siya kailanman nag-utos o pumayag sa sinumang gumawa ng hakbang na makapipinsala sa taumbayan o dudungis sa kanyang pangalan.
Malugod din niyang tinatanggap ang isang makatarungan, malinaw, at walang kinikilingang imbestigasyon, at ipinaalala na boluntaryo siyang bumaba bilang Speaker ng Kamara bilang patunay ng kanyang suporta sa isinasagawang pagsisiyasat.
Paliwanag ni Romualdez, nanahimik siya bilang paggalang sa proseso, ngunit patuloy pa rin siyang binabato ng mga malisyosong akusasyon nang walang sapat na ebidensya.
Muling iginiit ng kongresista na hindi siya nagnakaw sa pondo ng bayan at kailanman ay hindi niya inasam ang perang galing sa kasamaan.
