Hindi garantiya ang pagiging menor de edad para makaligtas sa pananagutan sa batas ang mga kabataang nanggulo sa Maynila kasabay ng kilos-protesta nitong Linggo.
Giit ni Palace Press Officer at Usec. Claire Castro, dadaan sa imbestigasyon ang mga kabataang naaresto at kung mapatunayan kumilos sila nang may “discernment,” maaari silang kasuhan at mapatawan ng parusa ng korte.
Suspendido lamang ang pagpapatupad ng senitensya hanggang umabot sila sa edad na dalawampu’t isa.
Dagdag ni Atty. Castro, may intervention program mula sa Department of Social Welfare and Development at social workers, ngunit iginiit niyang hindi sapat na dahilan ang pagiging menor de edad upang agad na maabsuwelto sa kaso.
Hindi rin aniya sapat ang dahilan ng ilang magulang na sila’y nadamay lamang sa gulo dahil tungkulin ng mga magulang na alamin kung nasaan at ano ang ginagawa ng kanilang mga anak sa oras ng kaguluhan.
