Ibinunyag ng Department of Interior and Local Government na sinadyang bayaran at ‘organized’ na ang naganap na ‘riot’ sa Mendiola Street sa Maynila, sa gitna ng ikinasang kilos-protesta kontra korupsyon noong Linggo, Setyembre a-bente uno.
Ayon kay Interior and Local Government Secretary Jonvic Remulla, ang mga batang edad labing-isa pababa na lumahok sa protesta ay sinasabing nabayaran ng tatlong libong piso para lumahok sa riot at inutusan umano na sunugin ang Malacañang.
Sinasabi namang nakuhanan pa ng video ang mga kabataan habang ipinapakita ang perang natanggap at ipinagyayabang ito sa social media.
Gayunman, iniimbestigahan pa ng mga otoridad ang mga nag-organisa at nagpondo sa kaguluhan batay sa testimonya, video, at larawan.
Posibleng isampang kaso ang arson, paninira ng ari-arian, inciting to sedition, at sedition.
Kasunod nito, nilinaw din ng D-I-L-G na hindi gumamit ng tear gas ang pulisya; bagkus, ang mga nag-riot umano ang nagtapon ng tear gas, paputok, at tubig mula sa kanal laban sa mga otoridad at maging sa media personnels.
