Muling nanawagan ang Volunteers Against Crime and Corruption ng transparency at accountability kay Defense Secretary Gilberto “Gibo” Teodoro Jr. kaugnay sa mga isyung bumabalot sa kanyang pagiging dual citizen at paggamit ng foreign passport.
Ayon kay V.A.C.C. President Arsenio “Boy” Evangelista, hindi sapat ang simpleng paliwanag o blanket denial na inilatag ng kalihim.
Binigyang diin pa ng pangulo ng grupo na dapat na magsalita nang direkta si Sec. Teodoro upang malinawan ang publiko, lalo’t lumabas sa isang ulat na maging ang kanyang asawa, na ambassador, ay may hawak ding foreign passport.
Gayunman, ipinunto rin ni Evangelista na ang naturang isyu ay hindi lamang ligal kundi moral at politikal lalo’t lumulutang ang pangalan ng kalihim bilang posibleng kandidato sa 2028 presidential elections.
