Iginiit ng Department of Justice na hindi “personality driven” o naka-direkta sa isang partikular na grupo o indibidwal ang ginagawang imbestigasyon hinggil sa kaso ng mga nawawalang sabungero.
Ayon kay Justice Undersecretary Raul Vasquez, kung sino man ang ituturo ng mga ebidensya sa pagtatapos ng imbestigasyon ay siyang pangunahing may kinalaman sa kaso.
Wala rin aniyang personal na agenda ang D-O-J sa imbestigasyon at ginagampanan lamang nila ang kanilang tungkulin sa paglutas sa ilang taong misteryo.
Sa kasalukuyan, nagpapatuloy pa rin ang pagkakalap ng ebidensya ng mga otoridad na layong palakasin ang kaso na maaaring isampa sa korte laban sa mga personalidad na siyang matutukoy na nasa likod nito.
