Totoo nga naman na masakit ang ma-betray, lalo na ng sarili mong pamilya o kaibigan. Pero ang lalaking ito mula sa Las Piñas, ipinagkanulo mismo ng kaniyang girlfriend! Paano ba naman kasi, marami palang nakaabang na kaso laban dito.
Kung ano isinagawang plano ng babae, eto.
Makikita sa isang video na kinuhanan sa isang kalsada sa Las Piñas City ang isang lalaki na bumaba sa tapat ng isang convenience store mula sa sinasakyan nitong MC Taxi.
Kikitain sana ng lalaki ang kaniyang girlfriend sa nasabing lugar pero bigla na lang nagdatingan ang mga myembro ng PNP Highway Patrol Group na kakuntsaba na pala ng babae at saka ito pinosasan at dinala sa camp crame.
Ayon sa mga otoridad, suspek ang lalaki sa isang uri ng carnapping modus na tinatawag na “rentangay”.
Ang siste, magrerenta ng mga sasakyan ang lalaki at hindi na ibabalik pa sa may-ari.
Bukod pa riyan, mayroon pa palang ibang mga warrant ang suspek dahil naman sa carnapping, illegal posession of firearms, at paglabag sa anti-fencing law.
Sinabi naman ng suspek na maaaring natakot ang kaniyang girlfriend na madamay sa mga isinagawa niyang krimen kung kaya ito na mismo ang nagsumbong sa mga pulis.
Guilty din ang lalaki sa paggamit ng ipinagbabawal na gamot at personal pa itong inamin. Pero aniya, sasailalim na raw sana siya sa rehab.
Samantala, nanawagan pa ang lalaki sa mga nabiktima niya na iurong ang reklamo laban sa kaniya at sinabing ibabalik niya ang kinuha niyang motor kung papayag ito.
Ikaw, anong naramdaman mo sa kwentong betrayal na ito? Nainis ka ba o mas natuwa pa?
