Nagpatupad ng total closure sa Carlos P. Romulo Bridge ang Department of Public Works and Highways (DPWH) sa Bayambang, Pangasinan.
Ipinasara ang tulay matapos itong gumuho kahapon habang dumaraan ang isang Elf truck na kargado ng fertilizer at dump truck na kargado naman ng buhangin.
Patungo sanang Camiling, Tarlac ang mga nasabing sasakyan nang maganap ang aksidente pasado alas tres ng hapon.
Ayon kay Col. Jeff Banged, Officer-in-Charge ng Pangasinan Police Provincial Office, apat ang sugatan kabilang ang dalawang drayber ng truck.
Samantala, pinayuhan naman ni DPWH-pangasinan 4th District Engineer Simplicio Gonzales ang mga motorista na pansamantalang dumaan sa mga alternatibong ruta habang inaayos ang gumuhong tulay. – sa panulat ni Hannah Oledan
