Posibleng nasawi ang 19 na indibidwal matapos tumaob ang isang bangka sa Mediterranean Sea sa baybayin ng Libya.
Ayon sa coast guard ng Libya, sakay ng tumaob na bangka ang 23 migrante na kinabibilangan ng mga Egyptians at Syrians.
Base sa imbestigasyon, sinusubukan ng nasabing bangka na tumawid sa Mediterranean mula sa bansang North Africa nang maganap ang insidente.
Tatlo sa kanila ang nareskyu, isang katawan ang narekober habang pinaghahanap pa ang 19 na nawawala.
Patuloy pang iniimbestigahan ng mga otoridad ang pangyayari kung saan, sa loob ng dalawang buwan ngayong taon, umabot na sa 192 migrants ang bilang ng mga nalunod at nasawi. —sa panulat ni Angelica Doctolero
