Nakikipag-ugnayan na ang Philippine National Police (PNP) upang matugunan ang usapin ng umano’y hoarding sa mga medical equipment at supplies tulad ng oxygen tank.
Ito’y ayon kay PNP Chief P/Gen. Guillermo Eleazar ay kasunod na rin ng patuloy na pagtaas ng kaso ng COVID-19 sa bansa gayundin ang paglabas ng iba’t ibang variant tulad ng Delta, Delta Plus at Lambda.
Ayon sa PNP Chief, hindi tama sa panahong ito na maging gahaman sa mga medical supply at equipment lalo pa’t kasalukuyang humaharap ang bansa sa isang public health crisis.
Kasunod nito, hinikayat ni Eleazar ang publiko na huwag magatubiling isumbong sa mga awtoridad kung may nalalaman silang indibiduwal na nagtatago o nagho-hoard ng mga medical supplies tulad ng oxygen tank.
Bagama’t una nang sinabi ni Health Sec. Francisco Duque III na wala pa namang kakapusan sa suplay ng oxygen tank ay hinimok pa rin nito ang publiko na iwasan ang hoarding upang magamit iyon ng mga higit na nangangailangan at maiwasang kapusin ang suplay nito. —sa panulat ni Jaymark Dagala (Patrol 9)