Patay ang anim katao at sugatan ang tatlong iba pa sa salpukan ng isang van at trailer truck sa Quirino Highway, Barangay San Vicente, Tagkawayan, Quezon.
Ayon sa mga otoridad nanggaling sa Maynila ang van sakay ang siyam na pasahero at patungo sana ng bicol samantalang ang trailer truck ay nagmula sa Naga City at patungong Cavite nang magkasalpukan.
Dead on the spot ang driver ng van gayundin ang katabi nito sa unahan at dalawa pang pasahero sa likod nila dahil sa tindi ng salpukan na nakawasak din at tila nalukot na papel ang unahan ng van.
Limang pasahero ang isinugod sa ospital at dalawa rito ay nasawi habang ginagamot samantalang ililipat naman sa mas malaking pagamutan sa Naga City ang isa pang pasahero na kritikal ang kondisyon.
Kuwento ng dalawang survivors nakaupo sila sa likod na dulong bahagi ng van at papaalis pa lamang sila sa Maynila ay napansin na nilang may ka video call ang driver habang mabilis na nagmamaneho at ilang beses na muntik maaksidente.
Sinabi naman ng truck driver na Arjay Brito na mabagal ang takbo niya nang sumalubong ang van na inabot pa rin siya aniya kahit sinubukan niyang igilid ang truck.
Iniimbestigahan na ng Tagkawayan Municipal Police Station ang nasabing insidente.