Posibleng maharap sa kasong perjury o pagsisinungaling ang ilang mga respondents sa kaso ng pagkamatay ng flight attendant na si Christine Dacera.
Ito ang babala ni National Capital Region Police Office (NCRPO) Chief P/BGen. Vicente Danao Jr., kasunod ng pagbawi ni Rommel Galido sa pahayag nito na may powder drugs umano silang ginamit sa New Year’s Party.
Gayundin ang pamimilit umano ng pulisya sa mga respondent sa kaso na magsinungaling kapalit ang kanilang paglaya, bagay na mariing itinanggi ng NCRPO.
Ayon kay Danao, nanumpa ang mga respondents na tanging katotohanan at pawang katotohanan lamang ang kanilang ihahayag subalit nag-iba na ang kanilang tono nang humarap sa media.
