Hindi na kailangan pang italaga si Vice President Leni Robredo bilang pinuno ng Inter-Agency Task Force on Emerging Infectious Disease (IATF-EID).
Ito ang tugon ni Presidential Spokesperson Harry Roque sa hamon ni dating Senador Antonio Trillanes IV.
Ayon kay Roque, tumutulong na si robredo sa pamahalaan para malabanan ang pagkalat ng coronavirus disease 2019 (COVID-19) sa sarili nitong pamamaraan at kung tunay aniya ang intensyon nito ay hindi na kailangan pang bigyan siya ng posisyon sa IATF.
Sinabi ni Roque, binibigyang pagkilala ng pamahalaan ang mga kontribusyon ng Pangalawang Pangulo sa laban kontra COVID-19 ng pamahalaan.
Kasabay nito, binuweltahan naman ni Roque si Trillanes na huwag baliktarin ang kanyang pahayag para sa pamumulitika.
Iginiit ni Roque, ang kanyang komento kay Robredo kung saan sinabihan niya itong magbigay na lamang ng solusyon sa halip na bumatikos ay simpleng sagot sa isang partikular na tanong.
