Hinimok ng Malakanyang ang kolumnistang si Ramon Tulfo na ibigay sa mga awtoridad ang mga impormasyon hinggil sa umano’y pagkakadawit ni dating Justice Secretary Vitaliano Aguirre sa pastillas scheme sa Bureau of Immigration (BI).
Ayon kay Presidential Spokesperson Salvador Panelo, bilang isang journalist, batid ni Tulfo na kinakailangan niyang maghain ng pormal na reklamo para makakilos ang pulisya at maimbestigahan si Aguirre.
Nang tanungin naman kung may kakayahan si Aguirre na gawin ang mga akusasyon laban sa kanya, sinabi ni Panelo na hindi niya ito personal na kilala.
Dagdag ng kalihim, maituturing ding inosente si Aguirre hangga’t hindi pa napatutunayang sangkot ito sa pastillas scheme.
Una nang isiniwalat ni Tulfo sa pagdinig sa Senado na mismong ang whistle blower at immigration officer na si Allison Alex Chiong ang nagsabi sa kanya na si Aguirre ang utak ng illegal na gawain sa ahensiya.
