Ilang opisyal ng Korte Suprema ang kinasuhan ni Atty. Larry Gadon, ang abogadong naghain ng impeachment complaint laban sa naka-leave na si Chief Justice Maria Lourdes Sereno.
Sa walong pahinang affidavit ni Gadon, kabilang sa inireklamo ng paglabag sa Republic Act 3019 o Anti-Graft and Corrupt Practices Act sina Atty. Anna-li Papa-Gombio, Deputy Clerk of Court ng Supreme Court En Banc at Chairperson ng Special Committee on Retirement and Civil Service Benefits;
Atty. Jocelyn Fabian, Court Attorney sa Office of the Chief Justice at Chairperson ng Legal Technical Working Group.
Dahil umano sa kapabayaan nina Gombio at Fabian, dumanas ng pinsala ang mga surviving spouses ng mga retiradong mahistrado at hukom kaya’t ng naantala ang pagpapalabas ng kanilang survivorship benefits.
Ang masaklap pa anya, ilan sa mga aplikante ay pumanaw na bago naaprubahan ng Supreme Court ang kanilang aplikasyon para sa benepisyo.
Lumabas sa impeachment hearing sa House Justice Committee na inirekomenda nina Gombio at Fabian na ibasura ang 29 na aplikasyon para sa survivorship benefits pero hindi ito pinaburan ng S.C.
-Bert Mozo
