Anim na kotong cops ang arestado matapos mahuli sa akto ng pangongotong sa mga dumarayong negosyante sa Caranglan, Nueva Ecija.
Kasama rin sa nadakip sa entrapment operations na isinagawa ng PNP counter intelligence task force ang dalawang sibilyan na nagsisilbing taga kolekta ng mga pulis.
Ang mga naarestong pulis na pawang nakatalaga sa Caranglan Municipal Police Station ay kinilalang sina SPO1 Antonito Otic, PO3 Danilo Sotelo, PO3 Ronald Buncad, PO3 Oliver Antonio, PO2 Rodrigo Edralin at PO2 Romeo Nuniez lll.
Isinasagawa ng anim na pulis ang pangongotong sa mga pumapasok na negosyante sa kanilang bayan sa pamamagitan ng pagharang sa kanila sa check point.
Napagalamang dito sa Camp Crame nakakulong ngayon ang mga pulis habang inihahanda ang kasong administratibo laban sa kanila.
