Ibinunyag ni Bayanmuna Partylist Rep. Carlos Zarate na tuloy pa rin ang mga isinasagawang pagdinig ng ERC o Energy Regulatory Commission.
Ito’y kahit pa una nang sinuspinde ng Ombudsman ang apat na commissioner nito dahil sa umano’y midnight at sweetheart deals ng komisyon sa MERALCO o Manila Electric Company.
Ayon kay Zarate, isa aniyang lantarang pagsuway sa kautusan ng Tanodbayan ang ginawa ni ERC Chairman Agnes Devanadera dahil malinaw na may paglabag ang apat na opisyal sa batas na dapat nilang pagdusahan.
Dahil dito, hinimok ni Zarate ang Ombudsman na agad na kumilos at parusahan ang lahat ng dapat parusahan upang hindi na pamarisan ng iba pang mga opisyal at kawani ng pamahalaan ang ganitong pagsuway.
Magugunitang kabilang sa pinatawan ng isang taong suspensyon ng Ombudsman sina Commissioners Alfredo Non, Josefina Asirit, Victoria Taruc at Geronimo Sta. Ana.
