Handa ang LTFRB o Land Transportation Franchising and Regulatory Board para sa isasagawang tigil pasada ng grupong PISTON sa susunod na linggo.
Ayon kay LTFRB Board Member at Spokesperson Atty. Aileen Lizada, naka-activate na ang kanilang JQRT o Joint Quick Response Team para umalalay sa mga pasaherong ma-a-apektuhan ng dalawang araw na kilos protesta sa Disyembre a-kuwatro at a-singko.
Kasunod nito, nagbabala naman si Transportation Secretary Arthur Tugade na posibleng maharap sa kanselasyon ng lisensya at prangkisa ang lahat ng mga tsuper ng jeepney na lalahok sa nabanggit na pagkilos.
Giit ni Tugade, malinaw ang pananagutan ng mga jeepney drivers na bigyan ng maayos na serbisyo ang publiko salig sa ipinagkaloob sa kanilang prangkisa.
Magugunitang nagresulta sa kanselasyon ng pasok sa mga paaralan at tanggapan ng gubyerno ang ginawang tigil pasada ng grupo nuong isang buwan bilang pangangalaga na rin sa seguridad ng mga maaapektuhang pasahero.
