Umaasa ang mga pinuno ng ASEAN o Association of South East Asian Nations na makikipagtulungan ang lahat para matigil na ng tuluyan ang pagkalat ng anumang uri ng mali o pekeng mga impormasyon at balita.
Ito ang inihayag ni PCOO o Presidential Communications Operations Office Secretary Martin Andanar na siyang chairman ng AMRI o ng Asean Ministers Responsible for Information ngayong taon.
Sa kaniyang pahayag, pinapurihan nito ang ginagawang hakbang ng mga information ministers sa rehiyon para maihatid ng tama, balanse at patas ang mga balita sa kanilang mga mamamayan.
Magugunitang inulan ng kaliwa’t kanang batikos ang PCOO dahil ilang opisyal at tauhan nito ang naakusahan hinggil sa umano’y pagpapakalat ng mga fake news gamit ang social media.
