Arestado ang magkapatid na sinasabing big time distributors ng iligal na droga sa Sarangani Province at miyembro din ng lokal na teroristang grupo.
Kinilala ang magkapatid na sina Faroon at Alhotabby Lumatao na nadakip ng pinagsanib na pwersa ng Joint Task Group GenSan at ng Philippine Drug Enforcement Agency o PDEA Region 12 sa Barangay Kanalo, Maasim.
Narekober sa dalawa ang apatnapung (40) gramo ng shabu, isang rifle grenade, hand grenade, 40 milimeter grenade launcher, mga bala, mga bank deposits slip, tseke, passbook at hindi nabanggit na halaga ng salapi.
Nakuha din sa dalawa ang bandila ng ISIS na patunay na sila ay kasapi ng Al Khalifa Philippines na supporters ng Maute Terror Group sa Marawi at Lanao del Sur.
Ayon kay PDEA Region 12 Chief Gil Castro, ang magkapatid na Lumatao ay protektor aniya ng tinaguriang El Patron Drug Group na nag-o-operate sa South at Central Mindanao.
